Kulturikkut kingornussat Sisimiuni oqallisigilerpaat

Illuutit illoqarfiullu ilai allanngutsaalisassat pillugit aalajangersimasunik malittarisassaqarpoq. Innuttaasulli aamma siunnersuuteqarsinnaallutillu akerliusinnaatitaapput. Kulturikkut kingornussat illuutillu allanngutsaalisassat pillugit innuttaasut paasisaqarnerunissannut Qeqqata Kommunia periarfissiivoq.

Isumasioqatigiinneq kulturip illuani Taseralimmi ullumi nalunaaqutaq ataatsimiit pissaaq tassanilu saqqummiussisussat ilaatigut tassapput Nunatta Allagaateqarfianeersut, nuna tamakkerlugu pilersaarusiornermut immikkoortumeersut aamma Qeqqata Kommuniani illoqarfiup pilersaarusiorneranut immikkoortoqarfimmeersut. Siunnersuisartut Raavad.dk-meersut aamma illussanik titartaasarfik Sisimiuniittoq Sanati saqqummiussisunut ilaassapput.

- Isumasioqatigiinneq naammassippat aalajangersimasumik isummiussinianngilagut. Kisianni oqallinneq ingerlaqqissaaq, kulturikkulli eriagisassat illullu allanngutsaalisassatut aalajangiunneqartut pillugit innuttaasut paasisaqarnissamut periarfissinneqassapput, borgmester Hermann Berthelsen oqarpoq.