Kulturi timersornerlu suleqatigiillutik nukittorsarniarpaat
Kulturimik, timersornermik angallassinermillu aaqqissuussinerit. Tamakkuupput timmisartuutileqatigiiffiup Air Greenlandip, Kulturikkut Illorsuup, Katuap, Nunani Avannarlerni Piorsarsimassutsikkut Attaveqaatip, NAPA-p, aamma Kalaallit Nunaanni Timersoqatigiiffiit Kattuffiata, GIF-ip, siunissami suleqatigiinnissamik isumaqatigiissuteqarfigisaat.
Allattoq Louise M. Kleemann
Isumaqatigiissut ukiuni pingasuni atuuttussaq, kulturikkut, timersornikkut angallannikkullu Kalaallit Nunaanni suleqatigiinnerup nukittorsarnissaanik siunertalik, taakku sisamaallutik ippassaq atsiorpaat.
Kulturi timersornerlu nuannaalersitsisarput, inuiaqatigiit kalaallit ataatsimulersittarpaat Kalaallit Nunaatalu ajunngitsumik avammut niueqatigiinnermik periarfissanik pilersitsisoralugit, atsioqatigiit tusagassiutinut allapput.