Kulturi pillugu isumasioqatigiinneq ullumi nanginneqarpoq
Kultureqarneq pillugu Nuummi Katuami isumasioqatigiinneq isiginnaartitsisartunik, nipilersortartunik, atuakkiortunik, eqqumiitsuliortunik, filmiliortartunik aamma erinarsoqatigiinnik peqataaffigineqartoq ullumi nanginneqarpoq.
Allattoq Najaaraq Egede
decembarip 07-at 2008 13:17
Kultureqarneq pillugu siunnersuisoqatigiit Kultureqarnermut pisortaqarfik peqatigalugu isumasioqatigiinnermik aaqqissuisuupput.
Siunnersuisoqatigiit erseqqissumik takussaasumillu kultureqarnermut tunngatillugu politikkeqalernissaq anguniarpaat. Taamaattumik aamma qanoq kultureqarneq pillugu siunissami suliniutinik ingerlatsinissap suleqatigiillu qanoq ingerlariaaseqarnissaat pilersaarusiorfigineqassapput.
Kultureqarnermik suliallit peqataaffiisa assigiinngitsunik sammisallit kattuffiliornissaat aamma siunnersuusiorfigineqassaaq.
Siunnersuisoqatigiit siulittaasoraat Inge Olsvig Brandt.
Isumasioqatigiinneq naammassippat nalunaarusiortoqassaaq, taamaalilluni nalunaarusiaq 2004-meersoq nutarsarneqartussanngussalluni.
