Kommunerujussuanngortussaq kulturi pillugu ersarissumik polikkeqarnissaminik pisariaqartitsivoq, innutaasullu kulturip qanoq ineriartortinneqarnissaanik aalajangeeqattaanissaat aalajangiisuusorujussuussaaq, Nuuk kommuneani kultureqarnermut ataatsimiititaliaami siulitaasup Maliinannguaq Markussen Mølgård-ip Nuummi kulturi pillugu ataatsimeersuarneq ullumi ammarlugu taamatut ilaatigut oqaaseqarpoq. Siunissami kulturi qanoq ittoq inuttaasunit pisariaqartineqarnersoq siulitaasup tusarusuppaa.
Ullukkut paaqqinnittarfiit, atuarfiit, sunngiffinni ornittakkat suliffeqarfiiillu annertunerusumik kulturi pillugu politikkimik nutaamik pilersitseqataanerusariaqarput, kalaallit ileqqui eqqarsaatiginerullugit.
Kultur-erput uninngaannassanngilaq, ineriartortinneqartuassaaq, kultur-ikkullu ileqqutoqqagut ataqqisariaqarpagut, tamannalu pingaaruteqarpoq, Maliinannguaq Markussen Mølgård kultur pillugu Nuummi ataatsimeersuarneq ullumi ammarlugu ilaatigut taamatut oqarpoq.
