Kullorsuarmiut nammineerusupput

Nunaqarfik Kullorsuaq, 424-inik inoqartoq, piniartoqarfissuuvoq aalisartoqarfissuullunilu. Siorna piniarnermut allagartallit 53-it nalunaarsorneqarsimapput, aalisarnermullu allagartallit 71-it aamma nalunaarsorneqarsimallutik.

Nunaqarfimmiulli ukiuni kingullerni silap allanngoriartorneranik misillertinneqarsimaqaat:

- Ukiarluusarneratigut ukiaq manna misillingaatsiaratta. Tassalu Naalakkersuinikkut sulialinnit arlaatigut taperneqarsinnaanata. Taamaattumik ilaqutariit ataasiakkaat ukiaq manna assut ajornartorsiornikuupput, Thimothæus Petersen, Kullorsuarmi aalisartut piniartullu peqatigiiffianni siulersuisunut ilaasortaq oqarpoq.

Kullorsuaq aalisartoqarfissuullunilu piniartoqarfissuugaluarluni, Qaasuitsup Kommuniani nunaqarfiit allat assigalugit suliffissaaleqiffiuvoq. Januaarimi arnat 51-it angutillu 64-it Kullorsuarmi suliffissarsiorlutik nalunaarsimapput.

Aningaasaateqarfik pilersinniarneqartoq aalisartunut piniartunullu ukiuunerlunnerani eqqornerlunneqartunut ikiorsiisassasoq pilersaarutigineqarpoq.

Aningaasaateqarfik pilersinniarneqartoq agguaasalertinnani Kullorsuarmi aningaasannanniarnikkut ukiuni tulliuttuni pingasuni immerneqaqqaassaaq.