Kullorsuarmiu: Qilalukkanik asuli pineq nuanninngilaq
Kullorsuarmiu Lars Jensen taama oqarpoq:
- Taama annertutigisumik taamaaliortoqarsimammat soorunami nuanninngilaq. Raatiu taama ammatigisoq Kullorsuarmiunulluunniit iluatikkullugit nalunaarsimappata, tamanna immaqa nuannernermik pisimassagaluarpoq. Neqit piniartut tamatta soorunami aamma inuussutissarsiutigisaratsigit, Kullorsuarmiu Lars Jensen oqarpoq, nangillunilu:
- Eqqarsarnartorujussuuvoq annermik tamakkua uumasunik illersuiniaqatigiiffiit taama sakkortusaarniartartigisut, uagullu suli inussutissarsiutigalutigit, ataaseq imaluunniit tallimalluunniit qulilluunniit eqqaanni tamannak pisoqaraangat tamatta eqqorneqartarnerput piiaaffigitilluta taanna akisoorujussuuvoq, Lars Jensen Kullorsuarmiu oqarpoq.
Qilalugarpaaluit mattaajaannariarlugit qimaannarneqarsimanerat ajuusaarnarlunilu avaanngunarpoq, akuerineqarsinnaananilu. Aalisarnermut piniarnermullu siunnersuisoqatigiit taama isumaqarput, soorlu aamma Piniarnermut Naalakkersuisoq Karl Lyberth taama isumaqartoq:
-Assigiinngitsutigut avammut saqqummeraangatta soorlu uagut Naalakkersuisuusutut oqaluttarpugut atorluaalluta, aamma soorunami taanna tamatta atortussaagatsigu atorluaasariaqaratta. Taamaattumik ajuusaarnartupilussuuvoq akunnitsinniittoqarmat piniartunik atorluaanngitsunik, Aalisarnermut Piniarnermut Nunalerinermullu Naalakkersuisoq Karl Lyberth, Qanoruumut ippassaq oqarpoq.
Inatsisit piniarnermut toqqammaviusut pillugit paasititsiniaasoqassasoq, taassuma aamma oqaatigaa, taamatullu qilalukkanik asuli pisoqarsimanerata Nunatsinnut kingunerisinnaasai pillugit aamma paasititsiniaasoqassasoq oqaatigalugu. Nunattami avataanit isigineqarneranut pingaaruteqarpoq, Karl Lyberth oqarpoq:
- Taamatut pisoqallattaassappat soorunami uagut isigineqaatitsinnut iluaqutaanavianngilaq, aamma oqaatigilluaannarlugu akornutaasupiluussuussagami, Aalisarnermut, Piniarnermut Nunalerinermullu Naalakkersuisoq Karl Lyberth oqarpoq.
Qilalukkanik mattaajaaginnarsimasut arsaagaasinnaapput, akiliisitaasinnaallutillu, kikkuunersullu aamma paasineqareersoq, Qanoruumi ippassaq oqaatigineqarpoq, qassiunersulli oqaatigineqarani.
