Kukkunersiuinermik ataatsimiitsitaliap nalunaarutaa: Kuupik V. Kleist 20.288 koruuninik akiligassaqarpoq
Naalakkersuisuni ilaasortaasimasut Nunatta karsianut akiitsoqarnerannik misissuisitsineq utaqqineqartoq novembarip arfineq aappaani naammassineqartoq, kukkunersiuinermut ataatsimiititaliap ullumi kiisami saqqummiummagu tamanna erserpoq.
Kikkut akiligassaqarsimappat? misissuititsineq qanoq inerneqarpa?
Taakkuupput ullumi kiisami akissutissarsitinneqartut.
Ukioq 2013 aamma 2014 misissornerani Aleqa Hammondip, Ane Hansenip, Anthon Frederiksenip, Kuupik Kleistip, Mimi Karlsenip, Ove Karl Berthelsenip aammalu Steen Lyngep atuuffimminni akiligassaqarsimanersut misissorneqarmata ukua inernerai:
Misissuititsinermi paasineqarpoq Naalakkersuisuusimasuni misissuiffigineqartuni Kuupik Kleist kisiartaalluni suli nunatta karsianut akiligassaqartoq. Atuuffimini 2009-miit 2013-nimut katillugit 100.000 koruunit missaaniissimasut, novembarillu arfineq aappaani misissuititsineq naammassimmat 20.288 koruunit suli akilerneqarsimanngitsut nalunaarutigineqarpoq. Akiligassai angalasarnermini ilaquttani angalaqataatillugit akiligassarilersimavai.
Aleqa Hammond 2013-mi nunatta karsianut 149.347 koruuninik akiligassaqarsimavoq, 2014-milu 41.413 koruuninik. Taakkua saniatigut 14.145 koruunit 2013-nimi nammineq aningaasartuutissat ingerlatsinermut ilanngunneqarsimapput. Akiligassalli novembarip arfineq aappaanni misissuisitsineq naammassineqarmat akilerneqareersimapput.
Aamma atuaruk Aleqap Nunatta karsia atornerlukkaa
Aamma atuaruk ATAATSIMUT ISIGALUGU Aleqa Hammondip nunatta karsianik atornerluisimanera
Steen Lynge 2013-mi nunatta karsianut 23.435 koruuninik akiligassaqarsimavoq, 2014-milu 25.212 koruuninik akiligassaqarsimalluni. Taakku akiligassat ilaquttanilu angalanernut marlunnut akiligassat naalakkersuisoqarfimmiit akiligassinnginneqarneranik tunngaviuvoq. Septembarimilu Aleqa Hammondip akiligassai pillugit saqqummertoqarmat nammineq saaffiginninnermigut akiligassat akilersimavai. Misissuititsinerullu naanerani akiligassaqarsimanngilaq.
Novembarillu pingajuanni 2009-miit 2013-nimut Naalakkersuisuusimasut misissorneqarmata inernerivaa Anthon Frederiksen 2009-miit 2013-mut 50.000 koruunit angullugit akiligassaqarsimasoq. Annikinnerumaamillu Ove Karl Berthelsen 17.522 koruunit Mimi Karlsenilu annikinnerpaajullutik 2.717 koruuniinnaasimammata. Taakkuli tamarmik akiligassatik akilersimagaat nalunaarummi allassimavoq.
Naalakkersuisut suli oqaaseqaateqanngillat
Decembarip 17-nilu Kukkunersiuinermik Ataatsimiitsitaliap nalunaarusiaq suliaralugu naammassigamikku innuttaasunut saqqummiutsinnagu kissaatigisimavaat Naalakkersuisut isummernissaat. Maannalu Kim Kielsenip inassuteqarnera malillugu nalunaarusiaq Naalakkersuisut suli oqaaseqarfiginngikkaat saqqummerpoq.
Kim Kielsenillu neriorsuutigaa januaarip 16-ni siusinnerpaamik oqaaseqaatertik saqqummiutissallugu. Naalakkersuisut nutaat iverteqqammernerat, juullip ukiortaallu akornanni ulapaarneq, naalakkersuisoqarfinnut tusarniaaneq kiisalu akissutit nutsernerat pissutigalugit.
Radioaviisimiit Kuupik Kleist akiligassaanut tunngatillugu oqaaseqartinniarsimagaluarparput iluatsinnaguli.
