Kujataanut timmisartuussinerit kinguaattooqqassapput
Silap ajornera pissutigalugu ippassaq pingasunngornermi aggustip ulluisa 22-ianni timmisartoq Narsarsualiartoq Islandimut saqisariaqarsimavoq tassanilu unnuilluni. Ullumikkut misileeqqikkaluarpoq, aammali minngitsoorluni. Københavnimut utiinnartariaqarsimavoq.
Tamanna ilaasunut ajoraluartumik kinguaattoornernik kinguneqassaaq. Air Greenland taama nalunaaruteqarpoq.
Timmisartoq ullumikkut Københavnimut utiinnartariaqartoq ulluni aggersuni timmiffissaqareerpoq, Air Greenlandilu timmisartortitseqatigiiffinnit allanit timmisartumik attartorsinnaanermut misissuigaluarpoq, iluatsinngitsumilli.
Taamaattumik ilaasussarpaaluit ornitaminnut aatsaat arfininngornerpat aggustip ulluisa 25-ianni apuunneqarsinnaassapput.
Ilaasussat Københavnimiit maannakkut Narsarsualiartussaagaluit 98-iupput. Taakku ilaat Kangerlussuakkoortinneqarlutik Nuummut aqagu apuunneqarsinnaassapput, sinnerilu arfininngorpat apuunneqarsinnaassallutik.
Narsarsuarmi sila ajussanngippat Air Greenland Dash-7-it atorlugit ilaasunik ullumikkut Kangerlussualiartitsillunilu Nuummukartitsissaaq, tassanngaanniit Københavnimut ingerlaqqikkumaartussanik. Ilaasussat maannakkorpiaq nuunniarneqarput aqagu tallimanngornermi Kangerlussuakkoorlutik Københavniliarsinnaasunngorlugit.
Air Icelandip Narsarsuarmiit Reykjavikkimut aqagu tallimanngornermi timmisartuussiffissaa ilaasunik aamma angallassissaaq. Ilaasut taakku Reykjavikkimiit Københavnimut ingerlateqqinneqassapput.
