Kujataani uuliasiornissaq piareersarneqaleruttorpoq
Uuliamik ujaasilluni qillerinerit Kujataani aamma ingerlanniarneqalerput. Skotlandimiut uuliasiortitseqatigiiffiata Cairn Energyp Nunap Isuata eqqaani aappaagu misileraalluni uuliamik qilleriniarluni pilersaarutigaa.
Allattoq Elisa Isaksen
januaarip 08-at 2010 09:15
Uuliasiortitseqatigiiffik misissuiffissanut sisamanut, Nunatta Isuata eqqaaniittunut, akuersissuteqarpoq, taakkua taaguuserneqarlutik Kingittoq, Saqqamiut, Uummannarsuaq aamma Salliit.
Cairn Energy Nunap Isuata eqqaani juunimi qillerivinnik marlunnik inissiiniarpoq, ukiullu sinnerani 2011-mi qillerinissaq piareersarneqarniarpoq.
Uuliasiortitseqatigiiffik Qeqertarsuup kitaani qillerinissamut aamma akuersissuteqarpoq, aasamullu tamaani qilleriniarput. Cairn Energy Nunatta eqqaani uuliamik ujaasilluni qillerinissamut katillugit arfineq-pingasunik akuersissuteqarfigineqarpoq.
Sermitsiamit oqaatigineqarpoq, uuliasiortitseqatigiiffiup 2009-mi sajuppillatsitsisarluni paasissutissanik katersinermini 70 imaluunniit 80 millionit koruunit atorsimagai.
