Kujataani Takornariaqartitsivik ernumavoq

Nunap immikkoortuani Qaqortumi suluusalinnut 1199 meterisut takissusilimmik 360 millioni koruuninillu nalilimmik, mittarfiliortoqarnissaa inatsisartuni oqaluuserineqartussanngorpoq.

Narsarsuarmi mittarfiup Qaqortumut nuunneqarsinnaanera misissuiffigineqarmat paasinarsivoq nuussinissaq 900 millioni koruuninik akeqassasoq, tamannalu tunngavigalugu Qaqortumi suluusalinnut mittarfiliornissaq akikinnerummat Naalakkersuisut nutaanik mittarfiliortiternermi isumaliutersuutiminnut ilaatinniarpaat.

- Takornariartitsinermut sulialinnut pingaaruteqartoq tassaavoq, qulakkiissallugu pisariaqartikkatsigu imarpik qulaallugu timmisartuussinikkut periarfissaqarnissaq. Tassalu Narsarsuarmi mittarfimmit suli takinerusumik, uagut piumasavut inassutigisartakkavullu tassaajuaannarnikkuupput, kujataani nutaamik mittarfiliortoqassappat tassaassasoq mittarfik angisooq imarpillugu ikaarlugu timmisartuussinermi atorneqarsinnaasoq, Tina Jensen Destination South Greenlandimi direktøriusoq oqarpoq, nangillunilu:

- Qaqortoq nunap immikkoortuani 1199 meterisut takitigisumik mittarfittaassappat illoqarfimmut amerlasuutigut pitsaaquteqassaqaaq, kisianni imarpik ikaarlugu toqqaannartumik timmisartukkut attaveqaateqarneq annaassagutsigu tamanna takornariaqarnermik sullissinitsinnut annertuumik eqquissaaq. Tassa takornariat massakkut kujataanut tikittartut 75 procentii angullugit annaariaannavavut, taakkumi Københavni aqqutigalugu tikittarput. Soorunami aalajangerneq qanoq ittuussanersoq pissangassutigaarput, tassami pilersaarusiortoqarnissaa innersuussutigiuarsimavarput tamannalu pillugu oqallinnerit sivitsuuttuuissimapput, mittarfeqarnermullu tunngatillugu suli aaqqiissoqannginnera, takornariaqarnermik sulialinnut qanoq pilersaarusiornissamik nalornisitsipput, tammannalu pillugu aamma suliniutinut annertuunut aningaasaliisoqarusunngilaq.

Qaqortumi nunap immikkoortuani 1199 meterimik takissusilimmik mittarfiliortoqarnissaa inatsisartuni siullermeerlugu aqagu oqaluuserineqassaaq.