Kujataani takornarialerisut ernumapput
Air Greenland ippassaq nalunaarpoq bilitsit aappaluttut siumut utimullu 1.500 koruuninik qaffanneqassasut, tassa aqqut pineqartoq amigartooruteqarfiummat.
Kujataani takornariartitsinermut tamanna eqquisorujussuussasoq, Kujataani takornariaqarnermik suliaqartut tusagassiuutinut nalunaarput.
Kitaani neqeroorutigineqartartut assigisaannik Kujataani neqerooruteqarsinnaanngilagut. Sinerissap Kitaani ineriartortitsinissamut periarfissat killeqanngitsut, Kujataani periarfissat ukiut tamaasa ajorseriartinneqartarput. Siullermik umiarsuakkut angallassineq pisariaqartinneqaqisoq annaavarput, maannalu Kujataanukarneq Kitaani ornitassanit 34 procentimik akisunerulissaaq, Tina Jensen Destination South Greenlandimeersoq allappoq.
Taassuma siunissaq ungasinnerusoq isigalugu angallannermik aaqqissuussinerup pilersaarusiorneqarnissaa ujartorpaa, taamaalilluni Kujataa ineriartornermi peqataatinneqarniassammat.
