Kujataani kommunit pinnaatilerput

Kujataani kommunit kattuppata immikkoortortaqarfiit assigiinngitsut kujataani illoqarfinni sorlerniissanersut borgmesterit assortuussutigilerpaat.

Narsami borgmesteri Kiista P. Isaksen misigisimavoq oqartussaaffinnik Qaqortoq arsaartuiniarsarisoq.

Immikkoortortaqarfiit agguarnissaannut siunnersuut kommunit Kujataamioqatigiit Nanortalimmi ualeru ataatsimiinnerminni qaqileqqissavaat.

Qaqortup borgmesteria Simon Simonsen oqarpoq, kujataani inuussutissarsiuteqartut upernaaq Qaqortumi ataatsimiikkamik piumasarisimagaat, Qaqortoq qitiusumik Ingerlatsiviussammat Inuussutissarsiornermi Teknikkeqarnermilu Ingerlatsiviusussat Narsamiittussaagaluit Qaqortumiittariaqartut. Qaqortormiut siunnersuutaat pillugu Kiista P. Isaksen kommunit kujataamioqatigiit siulittaasut, ima oqarpoq.

- Qaqileqqittariaqarparput pinngitsuuinnata isumaqatigiissutigisariaqaratsigu ingerlariaqqinnissarput.

Narsamut tunngatillugu isumaqatigiissutiginikuuarput Ingerlatsinermut pisortaqassalluta, Inuussutissarsiornermi Qullersaqarfik Narsamiissasoq, Sulisoqarneq, Teknikkeqarneq Kulturilu.

Taava Qaqortumut tunngatillugu aamma pisortaq, Atuartitaaneq, Meeqqat, Isumaginninneq, Peqqinnissaq, Utoqqaat, Piginnaanngorsaaqqiineq, Aningaasaqarnikkut Ingerlatsineq Allattoqarfillu.

Nanortalimmut tunngatillugu aamma tassa pisortaq, Ineriartornermut Immikkoortortaqarfik, EU–mut tunngasunik Allaffeqarfik, Inatsiseqarnermut Immikkoortortaqarfik sulisunullu tunngasut, Aningaasaqarnikkut Pilersaarusiortarnerit Suliassat nuussorneqarneranut immikkoortortaqarfik kiisalu Inissiaatileqatigiiffimmut tunngasut. Taava tamakku tamatta isumaqatigiissutiginikuuarput aamma nalunagu tamaavitta isumaqatigiissutigalugu Narsarsualiarpugut, kisianni Narsarsuarmiinnitsinni Qaqortumi Kommunalbestyrelsi allanngortitsiumasimavoq oqarluni, Inuussutissarsiorneq kiisalu Teknikki Qaqortumut nuunneqassasoq, taamaasilluta uagut Sulisoqarneq Kulturilu kisiisa ingerlattussanngorlugit, taamaammat taanna akueriuminaatsorujussuugami. Politikkikkut Allaffissornikkullu Aqutsisoqatigiit tamarmik isumaqatigiissutiginikuusaat Nanortalimmiut, Qaqortormiullu soorunami allanngortinniarneqarnera akueriuminaakkami. Taanna eqqartoqqittussaavarput aamma ikaarsaariarnermut Aqutsisuugallartussat aalajangersagaat Qaqortuminngaanniit ikinnerussuteqarlutik siunnersuutaat qanoruna iliorniaripput taanna aamma

eqqartoqqittariaqaratsigu.

Taama oqarpoq Narsap borgmesteria Kiista P. Isaksen.

Kommunit Kujatamioqatigiinni politikikkut Aqutsisoqatigiivi ullo´qeqqata siorna Nanortalimmi ataatsimiilerput.