Kujataani kommunit akisussaaffiit agguarpaat
Kujataani kommunit ukiortaami 2009–mi kattukkunik allaffissornikkut ingerlatsiviit qanoq isikkoqassanerinik pilersaarutaat inissippoq.
Tamanna Nanortallip, Qaqortup Narsallu kommuniisa isumaqatigiissutigeqqammerpaat.
Ataasinngormat marlunngormallu kommunit pineqartut taakku pingasut Nanortalimmi ataatsimiikkamik, amerlanerussuteqartut akuersissutigaat ukiup uuma aallartilaarnerani Narsarsuarmi isumaqatigiissutigereersumasartik atuutinnassasoq.
Illoqarfinni pineqartuni allattoqarfeqassaaq, Atuartitaanermut, Kultureqarnermut, Inuussutissarsiornermut Sulissoqarnermullu immikkoortoqassapput, aningaasaqarnikkut ingerlatsiveqassaaq tassuma ataaniissallutik naatsorsuuserivik akissarsialerivillu taavalu akiliisitsiniaasarfik aggustusip aallaqqaataani 2008–mi Namminersornerullutik Oqartussanut nuunnissaa naatsorsuutigineqartoq kiisalu teknikkeqarnikkut immikkoortoqassallutik.
Qaqortumiissaaq borgmestereqarfik qitiusumillu allattoqarfik, aningaasanik aqutsisoqarfik pilersaarusiorfillu, atuartitaaneq, meeqqat, isumaginninneq peqqinnissarlu, utoqqaat, piginnaanngorsaqqiineq tassalu aamma qitiusumik allattoqarfik.
Qaqortup Narsamiit tigujumasaralui Inuussutissarsiornermut Teknikkeqarnermullu Qullersaqarfiit Narsamiiginnassasut amerlanerussuteqartut akuersissutigaat, taakkua saniasigut Sulisoqarnermi Kultureqarnermilu Qullersaqarfeqasssaaq.
Nanortalimmiissapput Ineriartornermut Immikkoortoqarfik, EU–mut tunngasunik allaffik, sulisut, aningaasaqarnermi pilersaarusiorfik, Inatsiseqarnermut Immikkoortoqarfik, Suliassat nussorneqarnerinut immikkoortoq Inissiaatileqatigiiffillu A/S Ini.
- Erseqqissassavara illoqarfiit tamarmik Ingerlatsinermut direktøreqassammata qullersaqarfinnik nakkutilliisussamik, kisianni Qaqortoq borgmestereqarfiussammat tassanniissaaq kommunaldirektøri, taama nassuiaavoq Kiista P. Isaksen, Narsami borgmesteri Kommunillu
Kujataamioqatigiit siulittaasuat.
Kommunini taakkunani sulisut toqqissimallutik sulifeqarnissaat angujumallugu kommunit taakku pingasuullutik isumaqatigiissutigaat, sulisut suliffimminik annaasaqassanngitsut.
