Kujataani inuiattut ullorsiornermi pisusssat taamaatinneqartut

Kommune Kujalliup inuiattut ullorsiornermi sapaatip-akunneranilu ullorsiornermi aaqqissuussinissat inuit 100-init amerlanerusut katersuuteqqusaannginnerat pissutigalugu taamaatippai.
Kujataani timersortarfinni ukioq manna inuiattut ullorsiornermi tusarnaartitsisoqassanngilaq. Assi © : KNR
Allattoq Malik Brøns
juunip 09-at 2020 08:10

Nunatta kujataani coronavirusimik suli tunillatsissimasoqanngilaq.

Nunatsinnut timmisartukkut angalanerit juunip ulluisa 15-ianni ammaanneqassapput. Naalakkersuisulli coronamik tunillaassuuttoqarnissaanut annikinnerpaatitsiniarlutik killilersuineri ilaat suli atuupput. Assersuutigalugu katersuuttoqarnissaanut inerteqquteqarneq.

Tamannalu Kommune Kujallermut inuiattullu ullorsiornerup nalliuttorsiornissaanut pingajalersumut kingunerluppoq.

- Aaqqissuinerit illoqarfinni tamani kiisalu nunaqarfinni silami sammisassaqartitsinerit nipilersornerillu unitsittariaqarneri aalajangerneqarpoq. Matumani aamma unnukkut tusarnaartitsinerit inuit 100-t palillugit katersuuteqqusaannginneq peqqutigalugu unitsiinnarneqarput, kommune tusagassiuutinut nalunaarummi allappoq.

Kommune nipilersortartussarsiortoq

Kommunili nipilersornikkut allatut aaqqissuussilluniarpoq. Utoqqaat illuini, katersugaasivinni, ulloq unnuarlu angerlarsimaffinni inuusuttuaqqalluunniit ornittagaanni aaqqissuussiniarpoq.

Taamaammat kommuni nipilersortartunit inuusuttunut utoqqarnullu nipilersorusussinnaasunik ujaasivoq.

Kommune Kujalleq kujataani nipilersortartunik assigiinngitsunik immiussiniarpoq, taannalu Seekon Radiokkut inuiattut ullorsiornermi aallakaatinneqassaaq. Kommune Kujalliup facebookimi qupperneratigut video aamma takutinneqassaaq.

- Taamaaliornikkut inuiattut ullorsiornermi ungasianiit ataatsimooqatigiittoqarsinnaasoq, kommune tusagassiuutinut nalunaarummi allappoq.

AAMMA ATUARUK Covid-19: Arsaannermi GM nalorninartumiittoq

Kommunip qanillinaveersaartitsigaluarluni inuiattut ullorsiornermi nalliuttorsiortitsiniarpoq, aalajangiinerli imaannaasimanngilaq.

Kommune Kujallermiit pisoqartitsisaleqqinnissatsinnut qilanaarpugut, ullunili makkunani pisortanit maleruagassat malittariaqaratsigit aalajangerneq imaannaanngikkaluartoq allatut ajornartumik ukioq manna inuiattut ullorsiornerput taamatut inissittariaqarsimavoq, kommune allappoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk