Assi: KNR

Kujataani illut radonillit

Inigisami radoneqassutsip, pingaartumik Narsami Qaqortumi ajornartorsiutaasup, killilersorneqarnissaata eqqumaffigineqarnerulernissaa Naalakkersuisut kissaatigaat.

Radon peqqissutsimut ulorianartuuvoq, aammalu silaannarmiippoq kræfteqalissutaasinnaasoq, takuneqarsinnaanani, naamaneqarsinnaanani mamassusersineqarsinnaanngitsoq.

Nunarsuarmi Peqqinneq pillugu Suleqatigiiffik WHO naliliivoq, radon inuit puammikkut kræfteqalertarnerannut peqqutaasartut pingaarnersaasa tullerigaat, taamaallaat pujortartarnermik qaangerneqarsimalluni.

- Ajornartorsiut tamanna annertuumik ilungersuuttariaqaripput qularineqassanngilaq. Radon sumi tamani nassaassaavoq, kisiannili katersuussimanera sumiiffimmiit sumiiffimmut allanngorarpoq. Maani misissukkat takutippaat, pingaartumik Narsami Qaqortumilu radon illuni katersuussimasoq annertusinnaasoq. Tamanna tunngavigalugu ulorianartorsiortut akornanniissinnaanerat paasiniarlugu angerlarsimaffinni radonip katersuussimasup misissuiffiginissaa pissutissaqarluarpoq. Tamatuma saniatigut erseqqissaatigineqartuartariaqarpoq, ullormut marlussoriarluni angerlarsimaffik silaannarissassallugu pingaaruteqartorujussuummat, Ineqarnermut, Attaveqarnermut Angallannermullu Naalakkersuisoq Jens B. Frederiksen oqarpoq.

Tamanna pissutigalugu Naalakkersuisoqarfiata quppersagaq  ”RADON illup iluani” suliarisimavaa, taannalu Narsami Qaqortumilu inoqutigiinnut agguaanneqassaaq. Tamatuma saniatigut quppersagaq itisiliiffiusoq ”RADON inissiarlu” suliarineqarpoq, paasissutissanik sukumiisunik itisiliiffiunerusunillu imaqartoq. Taanna uunga aaneqarsinnaavoq: www.byginfo.gl. ”RADON inissiarlu” aamma Narsami Qaqortumilu teknikkimut ingerlatsivimmut aamma A/S Inissiaatileqatigiiffik INI-mut aaneqarsinnaapput. 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl