Kujataani eqqartuussiviit ulapaartut
Qaqortumi arnaq 35-t missaanni ukioqartoq ukiumi ataatsimi pinerluuteqarsimasunut inissiisarfimmiittussanngorlugu pineqaatissinneqarpoq. Arnaq ikiaroornartunik hashinik 333-nik amerlassusilinnik, tassa 1 kiilumik oqimaassusilinnik iioraasimasoq politiinit heliportimi marsimi pingajuani tigusarineqarpoq. Tassunga arnamut angut 40-it sinnerlugit ukioqartoq ikiortaasimasutut kiisalu pinerluummut allamut atatillugu ukiumi ataatsimi qaammammilu ataatsimi pinerluuteqarsimasut inissinneqartarfianiittussanngorlugu pineqaatisinneqarpoq.
Nanortallip eqqartuussiviani angut 21-nik ukioqartoq arnaatikuminik toqqusassiilluni ilisimajunnaartitsisoq qaammatini quligiluani pinerluuteqarsimasut inissinneqartarfianiittussanngorlugu pineqaatisinneqarpoq. Eqqartuussulli unnerluunneqartumit sivisugineqarluni suliassanngorteqqinneqarpoq.
Nanortalimmi angut 27-nik ukiulik aapparisaminik arnamik 24-nik ukioqartumik savimmik tunuatigut kapisisimasutut qaammatini quligiluani pinerluuteqarsimasut inissinneqartarfinniittussanngorlugu pineqaatisinneqarpoq. Angut arnaatigisaminut ukiaq nakuusersutut aamma unnerluunneqarpoq.
Nanortalimmi angut inusuuttoq 20-nik ukiulik Nanortalimmi politeeqarfimmik apriilip sisamaani ikuallatseriaraluarsimasutut ukiuni marlunni pinerluuteqarsimasut inissinneqartarfianiittussanngorlugu pineqaatisinneqarpoq.
