Kujataani aqqusinersuassaq titartareerpoq

Kujataani aqqusinersualiassatut pilersaarutit marluk Attaveqarnermut Pisortaqarfiup naliliivigissavai.

Titartaasarfik Peter Barfoed Nuummeersoq tassaavoq Qaqortup Narsarsuullu akornanni Narsamiillu Narsarsuarmut aqquserniornissamut titartaasoq.

Aqquserniornissami immap naqqatigut aamma sullorsualiortoqarsinnaanera ilanngunneqartoq, Peter Barfoed oqarpoq.

- Immap naqqatigut sulluliornissaq akikinnerujussuuvoq, tassami ikaartarfiliortoqassappat takivallaassaqaaq, anorersuarajummallu taanna akulikippallaamik matuneqartassalluni. Tassa pingaaruteqangaatsiarpoq suliassap pilersaarusiamut sanilliulluni akisuallaannginnissaa, Peter Barfoed oqarpoq. Aperaarput immap naqqatigut sumerpiaq sullorsualiortoqarnissaa eqqarsaatigisimaneraat.

- Sajuppillatsitsisarluni misisueqqaarnissat pisariaqarput. Nuna annertooq sajuppillatsitsisarluni misissuiffigineqassaaq, taamaalioraannimi sulluliorfiusinnaasut amerlanerit periarfissaalissammata, Peter Berfoed oqarpoq.

Itillip Igalikullu akornanni immap naqqa 40 meterinik itissusilimmiittoq sajuppillatsittarlugu misisuisoqassaaq. Itillip avataani allami, soorlu Qassiarsuup tungaani immap naqqa annertujaaq aamma misissugassaqqissoq Peter Barfoed oqarpoq.

Kujataani aqqusinersualiornissamik pilersaarut atserneqarsimavoq ”Turbo på Sydgrønland”.