Kujataani akileraarut procentimik ataatsimik qaffassagunarpoq

Kommune Kujallermi aappaagu akileraarutit 1 procentimik qaffanneqartariaqalersinnaapput.

Tamatuma saniatigut aningaasartuutinik sutigut tamatigut ikilisaasoqassaaq aamma kommunip niuerniartarnera allanut suliassiissutiginiarneqarpoq kiisalu kommunip illuutaanik arlalinnik tuniniaasoqarniarluni.

- Kommune Kujalliup allatut ajornartumik aningaasartuutiminik amerlaqisunik ileqqaartariaqalernerata kinguneranik, sullissinerup ajorseriarneranik nassataqanngitsoortussaanera borgmesteritut innuttaasunut oqaatigisariaqarpara, Simon Simonsen kommunip aningaasaqarnikkut inissisimanera pillugu tusagassiuutinut nalunaarummini taama allappoq.

Naak 2008-mit 2011-mut allaffissornermut aningaasartuutit 13 procentimik appariartinneqaraluartut tamanna naammassimanngilaq.

Borgmesterip Naalakkersuisut aningaasaliissutiminnik ikilisaanerat, isumaginninnikkut aningaasartuuteqarnerulerneq aamma ulloq unnuarlu paaqqinnittarfinnut aningaasartuuteqarnerulerneq tamatumunnga pisuunerarpai.

Taamaattumik Naalakkersuisut ikiorsiinissaannik qinnuigai, taamaattorli naggasiutigalugu allalluni kommunit aningaasatigut assigiiaarnerusumik periarfissaqarnissaannik Naalakkersuisut suliniuteqartariaqartut.

- Imaattariaqanngilarmi kujataamiut atugaat periarfissaallu allanit allaanerussasut, Simon Simonsen naggasiivoq.