Kujataamiut akileraarnerulernissaat ilimasaarutigineqarpoq
Tamanna pivoq kommunip aappaagu 2011-mi aningaasanut missingersuusiat siullermeerlugit oqaluuserineqarnerani.
- Kommunalbestyrelsip kommunimut akileraarutip 2011-mi 1 procentimik qaffanneqarnissaa eqqartorsimavaa, Simon Smonsen aviisimut Kujataamiumut ilisimatitsivoq, oqarluni akileraarutit qaffanneqarnissaat pisariaqalersimasoq.
- Missingersuutit pillugit isumaqatigiinniarnerit sakkortusimapput, ilaatigut ilungersunartumik pingaarnersiusarsimavugut sutigullu assigiinngitsutigut ikilisaasariaqarsimalluta, Simon Simonsen oqarpoq.
Akileraarummik qaffaasariaqarnissaq pingasunik pissuteqartoq, Simon Simonsen nassuiaavoq. Tassa isumaginninnermut aningaasartuutit qaffakkiartupiloorsimapput, akileraarutitigut isertitat ikiliartorsimallutik naalakkersuisullu kommuninut ataatsimut tapiissutigisartagaat ikilisimallutik.
Kommunimi allaffissornermut aningaasartuutit 2008-miit 2011-mut soraarsitsinertaqanngitsumik 13 procentimik appartinneqarput, kisiannili pisariillisaanikkut aammalu atorfiit inuttaarunnerini allangortinneqarnerisigut aningaasartuutit appartinneqarlutik.
- Akileraarutit qaffanissaat annertuunillu ileqqaartoqarnissaa pilersaarutigineqaraluartoq kujataamiut ingasappallaamik eqqugaaqqunagit Naalakkersuisunit ikiorneqarnissarput suli pisariaqartipparput, borgmester Simon Simonsen naggasiivoq.
