Kujalleq pisortaanissarsiornissamut piareertoq
Kommune Kujallermi kommunalbestyrelsip ingerlatsivik Kommune Kujallermi pisortatut atorfik inuttassarsiornissaa akueraat.
Pisortaq nutaatut pisortaanerulissaaq, tamannalu ilutigalugu aningaasaqarnermut pisortap atuuffia kommunimi pisortap tullianut allanngortinneqassaaq. Tamanna kommunip qullersaqarfiani pitsanngorsaanikkut nutarterinikkullu aaqqissuussisoqarnerani pisoq, kommunalbestyrelsep oktobarip 16-iani immikkut ittumik ataatsimiinneranit imaqarniliani allassimavoq.
Maajip qaammataani - kommunimut qinersisoqaqqammersoq, pisortaanerusimasoq, Frank Hedegaard Jørgensen borgmesterertaamit, Kiista P. Isaksenimit suliunnaarsitaavoq.
Qullersaqarfiup pisortaata atorfia atorunnaarsinneqarniartoq
Borgmesteri aningaasaqarnermullu ataatsimiititaliaq kommunimi aqutsinermi nutarsaaniarnerat tunngavilersuutigineqarpoq.
AAMMA ATUARUK Kujalleq sender topchef hjem
Oktobarip 16-ianni ataatsimiinnermit inassuteqaatini allassimavoq, pisortaanerusimasoq atuuffimminit juunip naajartornerani soraartoq. Tamatuma kingorna aningaasaqarnermut pisortaq, Kenneth Høegh pisortaanerugallarpoq. Atorfillu taanna maanna inuttassarsiuunniarneqalerpoq, atorfiulli taaguutaa allaanerussalluni.
Kommunip allattoqarfiup pisortaata atuuffia piffissami atorunnaarsinniarpaa, taamaalillunilu ukiumut 900.000 koruuninik sipaaruteqassalluni.
Kommunimi aqutsisut imaalissapput, borgmesteri, allaffissornikkut pisortaq, pisortallu tullia. Allattoqarfiup pisortaa, Kim Dahl maanna aningaasaqarnermut pisortaagallarpoq.
Kommunip pisortaaneratut atuuffik kommunalbestyrelsip novembarip 22-ani inuttalersinnaassallugu neriuutigaa.
