Kuannersuit avatangiiserlu misissorneqarput

Narsap eqqaani Kuannersuarni assigiingitsunik aatsitassarsiortoqalissagaluarpat, aatsitassarsiornerup avatangiisinut sunniutissai suussanersut misissuisoqarpoq. Jannuaarip qaammataani nalunaarusiaq susassaqartunut, soorlu kommune kujallermi politikkerinit misissuataarneqarsinnaalissasoq ilimagineqarpoq.
oktobarip 17-at 2008 16:10

Kuannersuarni aatsitassat assigiingitsut 0,03 procentimik uran-imik akoqartut aatsitassarsioqatigiiffimmi Greenland Minerals and Energy-mi pisortaq Johannes Kyed oqarpoq.

Aatsitassarsiortoqalissappat avatangiisit qanoq sunnerneqassanersut misissuiffigineqarput, nalunaarusiortoqassallunilu.

Misissuinermi Narsarmiut ilaat, tassa nunami atuisut savaatillit, imeq, sissamilu uillut misissuiffigineqassapput, aatsitassarsiortoqannginnerani sunik akoqarnersut paasineqartariaqarmat.

-Aatsitassarsiortoqannginnerani imeq, uumasut, sissamilu uillut sunik akoqarnersut paasineqartussaavoq, tamatumalu kingorna aatsitassarsiortoqalerpat pujoralaat avatangiisinut qanoq sunniuteqassanersut paasiniarneqassallujni.

Suli oqaatigineqarsinnaangilaq Kuannersuarni aatsitassamik piiaanissat qaqugu akuersissuteqarfigineqassanersut, imaluunniit akuersissuteqarfigineqassannginnersut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq