Kuannersuit aatsitassarsiorfiulerpata fluori salittariaqassaaq

Fluor nalunngilarput kingutigissaatinut akugineqartartoq, kigutit putoqalinnginnissaannut illersuutaalluni. Grundstoffili fluori annertuallaaq timimiileraagami saarnit sananeqaataannut akornusiisinnaavoq, taamaalilluni nappaatinngorsinnaalluni toqussutaasinnaallunilu.

1960-ikkut aallartisimalerneranili Kuannersuit eqqaatalu nunataata sananeqaataanik misissuisalersoq oqarpoq mianersorfissaqartoq.

Gert Asmund, Danmarkip Avatangiisit Pillugit Misissueqqaartarfianni ilisimatusartutut suliaqartoq maannalu Kalaallit Nunaanni Aatsitassanut Ikummatissanullu Pisortaqarfimmi siunnersortaasoq ima oqarpoq:

-Fluorip mianersuunneqarnissaanut pissutaavoq aatsitassami natriumfluoridimi akuusoq toqunartuummat. Natriumfluorid imermi arrortinneqarsinnaavoq. Siallersumi qaqqami qaartitsisoqaruni natriumfluorid sialuup arrortissavaa. Siallersumi qaartitsinermi natriumfluorid arrortinnianngikkaanni qanoq iliuuseqartoqartariarpoq. Imeq kuuttoq tamaat katersorneqartariaqassaaq, kermikalianillu akoorlugu, oqarpoq nangillunilu.

- Taamaaliortoqarnissaalu qularnanngilaq, tassami fluor aningaasarsiutaalluarsinnaavoq. Fluorili tamakkerlugu piiarneqarsinnaanavianngilaq, taamaattoqassappallu mingutsitsineq annertuujussaaq, assersuutigalugu imeqarfiit mingutsinneqarsinnaallutik.

- Qujanartumilli imeqarfiit mingutsinneqarsimasut qanoq iluuseqarfigineqarsinnaapput, taamaattorli mianersuutassaassalluni Gert Asmund oqarpoq.

Kuannersuit eqqaata nunataa fluorimik akoqartorujussuuvoq aatsitassarsiortussallu piiaalerunik piiaanermi nalaani ilisimalikkaminnik atorluaasussaassapput. Imeq fluorimik mingutsinneqarsimasoq imerneqarsinnaajuaannassappat. imermik atoriikkamik ullumikkut saliisarnermut periutsit atorneqartariaqassasut ilimagineqarpoq.