Kuannersuarni urani Narsarmiunut ajoqutaasinnaavoq
Nalunaarusiami atuarneqarsinnaavoq, imeq aatsitassarsiorfimmeersup aamma aatsitassanik suliareqqiivimmit eqqakkat, qaqqat sivingarnisigut kuugussaasinnaaneranni, Narsap tasersuanut akulerussinnaaneri aarleqqutigineqartoq.
Nalunaarusiamik suliarinneqataasut ilagaat, avatangiisit pillugit suliniaqatigiiffik Avataq.
- Urani pillugu oqallinnermi, Jan Willem Storm van Leeuwen-ip maanna paasisai amigaatigineqarsimapput.
Avatangiisit illersorneqarnissaannik suliniaqatigiiffiit allat pingasut, tassaasut Det Økologiske Råd, NOAH Friends of the Earth Denmark amma peqatigiiffik Vedvarende Energi sinnerlugit, Avatap siulittaasua Mikkel Myrup taama oqarpoq.
Taassuma nalunaarusiami allaaserisami immikkoortumi ataatsimiittoq eqqummaariffiginerusimavaa, tassalu aatsitassarsiornermik suliaqartussap Greenland Minerals and Energy-p aatsitassarsiornermini ujaqqat, saffiugassat uranilu qanoq pinissaannik allaaserisaq.
- Aatsitassanik qalluinnermi sinnikut toqqorterneqartussat pinngitsooratik Narsap eqqaanut nunap iluatigut seerisussaassapput, taamaalillutillu Narsap avatangiisiannut ajoqutaasinnaanngussallutik, Mikkel Myrup oqarpoq.
Taassuma pissanngatigaa, aatsitassarsiorfiup sinnikunik toqqorterinerminni iliusissaq sorleq atorniarneraat. Mikkel Myrup-ilu isumaqarpoq Narsap eqqaaniittut tastit ilaat sinnikunik toqqorterinermut atorneqarsinnaanera eqqarsaatersuutigineqartoq, taamaattoqassappallu tatsip naqqa cementimik illersuuteqartinneqartussaassasoq oqaatigalugu. Mikkel Myrup annilaanngatigaa, mingutsitsinnginnissaq pillugu, GME-p qanoq iliuuseqarnerunnginnissaa. Tassami GME ulloq manna tikillugu suli siunnersuuteqanngilaq qanoq iliornikkut mingutsitsinnginnissamik suliniuteqarnerminnik.
Mikkel Myrup aamma piumasaraa, nalunaarusiaq nutaaq taanna, Nammisorlutik Oqartussat nittartagaanni atuarneqarsinnaasunngortinneqassasoq, tassami ulloq manna tikillugu tassani atuarneqarsinnaasut tassapput Greenland Minerals and Energy-p nakunaarusiaat namminnerlu akiligaat.
- Nalunaarusiat taakku qaasiuinerinnarmik aallaaveqartunik suliaapput, aatsitassarsiorniarnermilu ajoqutaanngitsuinnaat allaaserineqarsimallutik, soorlu urani eqqarsaatigalu taassumalu atomi atorlugu nukissiuuteqarnissanut atorluarneqarnissaa allaaserineqarsimallutik.
Avatangiisit pillugit suliniaqatigiiffiup, Avatap siulittaasua Mikkel Myrup taama oqarpoq.
Taassuma ilanngullugu oqaatigaa, GME-p suliniuteqarnertik pillugu assigiinngiiaartunik oqaaseqartarmata upperiuminaatsut, assersuutitullu oqaatigalugu, GME uranimik atuinermik isumaqataanngitsunik aperineqarnerminni, uranimik qalluineq allanik qalluinermi immikkut pissarsissutaaginnartartussaasoq oqaatigisarmassuk. Mikkel Myrup-ip aamma oqaatigaa uranimik qalluineq GME-p aningaasarsiornernut pingaaruteqarluinnartuusussaassasoq.
