URANI Kuannersuarni aatsitassarsiorneq inuussutissarsiornermik innarliissanngilaq

Kuannersuit eqqaanni nunalerineq inuussutissarsiornerluunniit sunnerneqarsinnaassappata Kuannersuarni uraanisiortoqarnavianngilaq. Uran pillugu Qulaarpaami sisamanngormat oqallittoqarnerani Kommune Kujallermi borgmesteri Jørgen Wæver Johansen oqarpoq.

- Inuussutissarsiornerit allat akigalugit Narsap eqqaani aatsitassarsiortoqarnianngilaq, Jørgen Wæver Johansen oqarpoq,

Kuannersuarni aatsitassarsiornerup savaateqarnermut nunalerinermullu sunniisinnaaneranik VVM-imi naliliisoqarpat uranisiornissaq piviusunngussanersoq borgmesteri aperineqarami ima akivoq.

- Naamik. Inatsisit naapertorlugit taamaattoqarsinnaanngilaq, Jørgen Wæver Johansen oqarpoq.

Taamalli oqarnera avatangiisinik illersornisumik suliniaqatigiiffimmit Avalammit nuannarineqanngilaq.

- Suliniut una avatangiisinut sunniinerlorujussuarnavianngitsoq inatsisini qularnaveeqqusiisinnaasorisoqaruni uppiasuunermik misigittaannermilluunniit takussutissaasoq uanga isumaqarpunga, Avalaap siulittaasua Mikkel Myrup oqarpoq.

Inuussutissarsiornermut, suliffeqarnermut, niuernermullu naalakkersuisup Randi Vestergaard Evaldsenip unitsitsinissamut piareersimalluni aamma oqarpoq.

- Avatangiisinut qaninnermut sunniuteqassappat soorunami unitsissavarput, Randi Vestergaard Evaldsen oqarpoq.

Uranisiorfik ammasuussaaq. Avatangiisinullu sunniuteqartussaasoq GME-mit aamma nalunaarutigineqarnikuummat, naalakkersuisoq aperineqarpoq Kuannersuarni uranisiornissaq maanna unitsinneqarsinnaalereernersoq, imalu akivoq.

Aamma atuaruk Uranisiornermi aarlerinaataasinnaasut geokemikerip nassuiaateqarfigai

- VVM-i naammassisaq suli takunngilara. Taanna takoqqaartinnagu naliliisinnaanngilanga, Randi Vestergaard Evaldsen oqarpoq. Tassungalu Mikkel Myrup ima akissuteqarpoq.

- Paasissutissat nunarsuarmiittut qimerluuginnassagitit uanga oqaannassaanga. Uranisiorfinni ammasuni avatangiisit, uumasut inuillu sunnerneqartartut misissuinerit takutereerpaat. Taamaammat uranimut tunngasunik isummersorniaraanni VVM-imut utaqqiinnarnissaq iluaqutaanngilaq, Mikkel Myrup oqarpoq.

DCE-mi siunnersortiuneq kemimik nunamiittumik suliaqartuusup, uranisiornermi nalorninartut annikillisarneqarsinnaasut, siornatigut oqaatigaa.
 
- Ulorianarsinnaasulli tamarmik peerneqarsinnaanngillat. Jens Søndergaard siornatigut oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat