Kræftertut utaqqinerini ajorsitikkiartorneqartarput

Uummannami najugalik 38-nik ukiulik Svend Fly 2007-mi upernaakkut aqajaqqumi paavatigut kræfteqartoq paasineqarpoq. Paasineqarneraniillu qaammatit marluk qaangiummata aatsaat nappaataa katsorsarneqarluni aallartinneqarpoq.

Svend Fly-p nulia Makkak Fly ima oqaluttuarpoq:

- Utaqqinermi siullermi suliaripallanneqarsinnaasutut nalilerneqaraluarpoq, utaqqinerujussuulli kingorna paasinarsivoq taamaattoqarsinnaajunnaartoq. Allatulli ajornartumik kimoterapi katsorsarneqartariaqartoq aalajangerneqarpoq, Makkak Fly oqarpoq.

Utaqqinerup nalaani Svend Fly katsorsaariaatsimik pitsaanerusumik neqeroorfigineqaqqaarsimagaluarpoq. Katsorsaariaaserli nutaaq Namminersornerullutik Oqartussani akuerineqanngimmat aappariit utaqqeqqittariaqarsimapput. Katsorsaariaaserliuna taanna nunatsinni akuerineqanngitsoq qanoq iluaqutitaqarsimasoq?

- Katsorsaariaatsip taassuma kræfti kisiat saassutaaralugu nungusarsinnaasimavaa timip sinnera ajoqusinngikkaluarlugu, Makkak Fly nassuiaavoq.

Katsorsaariaaseq nutaanngitsoq nunatsinni atorneqartoq danskisut standard behandlingimik taaneqartartoq kisiat isumalluutigalugu naggataatigut Svend Fly katsorsarneqalerpoq.

Juullilersorlu kalerrinneqarput Svendip katsorsarneqarnerata sunniutai arriippallaarsimammata kræftip milliartornera arriippallaarsimammat katsorsaariaatsip nutaap atornissaa nakorsaniit ornigineqanngitsoq.

- Massakkut ima inissisimavugut Danmarkimut adresselinngukkutta ikiorserneqaqqissinnaanata, oqarpoq.

Aperaarput taamaattoqarnera qanoq nalilersinnaaneraa.

- Isumaqarpunga periarfissaqaasaartoq suli allanik taamatut mattussuineq assorsuaq tupinnartumik ilungersunartumik inissisimaffiusoq. Nalunngilarput nunatsinni massakkut kræfti qanoq atugaatigisoq taavalu tusartareerlugit periarfissat allat pitsaanerusut misileraataasullu atorlugit amerlasoorpassuit aamma aaqqittalersimasut, Makkak Fly oqarpoq.

Peqqissutsimut naalakkersuisoq Arkalo Abelsen Makkak Flyp arlaleriarluni allakkatigut oqarasuaatikkullu attaviginiartarsimagaluarpaa itinerusumilli akissutisiffiginagu.

Svend aamma Makkak Fly pingasunik qitornaqarput Makkallu maanna aamma naartuvoq.