Kronprinset marluk kronprinsesselu tikeraassamaarput

Silap pissusaata allanngoriartornerata kingunerisaata takussutissartaat kunngissat paasiniarlugu nunatsinnukassapput. Kunngissaq Frederik aammalu Norgep kunngissaa Haakon Svenskillu kunngikkormiusa paniat angajulleq Victoria peqatigalugit maajip ulluisa 27-anni Kangerlussuarmut tikissapput tassangaaniillu sinerissami nakkutilliissummut Ejnar Mikkelsen-imut ilaallutik qeqertarsuup tunuanut angalassapput. Ilisimatuut nunarsuarmi tamarmi ilisimaneqarluartut kunngikkormiut angalaneranni peqataassapput, silap pissusaata allangorneratigut Kalaallit Nunaannut inutaanullu sunniutai paasiniarlugit takuniarlugillu angalaniarput.

Sinerissami nakkutilliissummi Ejnar Mikkelsen-imi angalanermi issittumi silap pissusaata allanngoriartornerata kingunerisaanik takussutissat misissorneqassapput, umiarsuarmilu saqqumiussisoqartarumaarluni aviisi Berlingske tidende tamanna pillugu allaaserisaqarpoq.

København-ip universitetata ilisimatuussutsikkut misissuisarfia Arktis Station Qeqertarsuarmiittoq pulaarneqassaaq, tassani nukissiuutit nungusaataanngitsunik ingerlataqartut sammineqarlutik.

Kunngikkormiut ilisimatuullu nunatsinni angalanerminni Ilulissanut aqqusaassapput, tassani nunarsuarmi sermimik annertunerpaamik aniatitsisoq takuniassavaat. Ilulissat kangerluaniittup kangerluup Eqip sermia kilometerinik 15-inik ilorparsimavoq. Kunngikkormiut angalanerminni ilisimatuut sermersuarmi misissuisarfiat NEEM takornariassavaat. Misissuisarfimmi tassani København-ip universitet-ia avatangiisinut sikullu pillugit suliffeqarfia, nunanit tamaneersut suleqatigalugit qillerinernik suliaqarput.

Kunngikkormiut Kalaallit Nunaani angalanerat juunip aallaqqaataata tungaanut ingerlanneqassaaq. Kunngissat pingasut taakkua aatsaat angalaqatigiissanngillat. Ukiup ataatsip matuma siornatigut kunngissaq Frederik norskit kunngissaat Haakon aamma Svenskit kunngissat Victoria Svalbard-imi angalaqatigiipput.