KRK-INUA Nuummi workshoppertitsinikkut nalilersuititsisoq
KRK-INUA aqqutigalugu sullissisimalerput. Uani sap.ak. naanerani piffissanngorsimavoq tamatuminnga nalilersueqatigiinnissaq.
Sap.ak. naanerani junip qulinganiik aqqaneq-aappaat ilanngullugu Nuummi Pisortatut Ilisimatusarfimmi KRK-INUA workshoppertitsilluni nalilersueqatigiisitsivoq. Workshoppertitsinermi peqataapput kajuminnertik tunngavigalugu sullissisartut suleqataasartullu Qeqertarsuatsiaaneersut, Ilulissaneersut, Aasianneersut, Sisimiuneersut Nuummeersullu.
Taakku saniatigut KRK´mi allaffissornikkut pisortaq, KRK-INUA´nilu inuusuttunut siunnerti peqataasillutik.
Workshoppertitsinikkut nalilersueqatigiisitsinermi siunertaasimavoq KRK-INUA´ta, kajuminnertik tunngavigalugu sullissisartuusut kiisalu suleqatigisartakkat allat ataatsimoorlutik ukiuni pingasunngortuni sulisimanerminni misilittagarilersimasaanik katersugaateqarusunneq. KRK-INUA tassaavoq Kalaallit Røde Korsiata ataani inuusuttunut sammisassaqartitsivik, 2013´mili aallarnerneqarsimasoq.
KRK-INUA Kalaallit-Nunaanni inuusuttunik arlaatigut atugarliuutilinnik kajuminneq tunngavigalugu sullissisartuuvoq. Sammisassaqartitsiviit aqqutigalugit sulissutigisarpaat inuusuttut inuusoqatiminnik immisut atugalinnik naapeqateqartarnissaat. INUA´ni sullissisuusartut aammattaaq maligassiuisutut nuannaartunartutut alloriaqqissinnaatitsisutut inissisimasuusarput. Misilittakkat katersugaataalertussat siunissami inuusuttunik atugarliutilinnik sullissinerup iluani pitsanngorsaanissami atornialersaarneqarput.
- Workshoppeqataalluni nuannersimaqaaq, eqqartorlugit uagut inuusuttut kajuminnerput tunngavigalugu sullissisartuusutut KRK-INUA-ni sunik sammisassaqartitsisarsinnaanerput, oqallisigalugillu. Kajumillutik sullisssisartut suleqatillu allat illoqarfinnit allaneersut naapisimaarlugit soqutiginarsimaqaaq isumassarsinarlunilu, taamannak Gabriel, kajuminnini tunngavigalugu Nuummi sullissisartuusoq workshoppertitsinermi naggasiinermi.
Workshoppernermi peqataasut paasissutissat ujartorniarsimavaat, pilersaarusiukkanik sammisassaqartitsisarsimanerit kajuminnertik tunngavigalugu sullissisartunut sullissanullu qanoq sunillu allannguisimanersut.
Taassumalu saniatigut siumut qiviarnissamut aamma periarfissiisoqarsimavoq oqallisigisanullu ilaavoq qanoq ililluni KRK-INUA kalaallit inuusuttaannut suli annertunerusumik nuannersumik misigisassartalersukkamik ataqatigiissaarisinnaanersoq.
