Kristumiuunngitsut qitornaat meeqqerivimmeeqqusaanngitsut

Ulluunerani paaqqinnittarfik taanna meeqqanut 29-nut inissaqarpoq, tassanilu juutit, musliimit, ateristit avinnerillu meeraat inissarsisinnaanngillat. Danmarkip Radioanit tamanna tusarliunneqarpoq.

Borgmesterip, kristumiut-demokraatit partiiannit, UDC-meersup, oqarnera naapertorlugu, malittarisassat taakku nutaartaqanngillat.

- Tamanna ukiorpassuit atoreerparput, allassimasunngorluguuna maanna pigileripput, oqarpoq.

Kristumiuunngitsut paaqqinnittarfinneeqqusaannginnerat borgmesterip arnap ilumuunnginnerarpaa, kisianni oqarluni, nunasisut meeraannik meeqqerivimmiittoqanngitsoq. Aviisimi El Paisimi tamanna allaaserineqarpoq.

Paaqqinnittarfik kommunimit akilerneqartarpoq, kommunalbestyrelsimilu ilaasortat ikinnerussuteqartut isumaqarput, malittarisassat Italiap naalakkersuinikkut aaqqissuussaaneranut naapertuutinngitsut.

Naalagaaffimmi pissutsinut ministeri, Roberto Maroni, qinnuigineqarpoq inatsisartuni tamanna saqqummiuteqqullugu.