Kristine Raahauge Nanortalimmi borgmesterinngorpoq

Nanortalimmiut ullumi borgmesterertaarput, borgmesteringortorlu Siumumeersoq tassaavoq 56-inik ukiulik Kristine Raahauge. Taanna Nanortalimmi 1993-imiit 1997 tikillugu aamma borgmesteriuvoq.

Tage Frederiksen Nanortalimmi politeeqarfimmi stationslederiunermi nalaani sulinerminut atatillugu annertuumik sumiginnaasimasutut eqqartuussaasimanini pissutigalugu borgmesteritut tunuarmat Kristine Raahaugep taarserpaa.

Kristine Raahauge Nanortallip kommunalbestyrelsiani Siumumit marlunnit Inuit Ataqatigiinnillu marlunnit toqqarneqarpoq.

Kristine Raahaugep borgmesteritut toqqarneqarnissi naatsorsuutigisimanngilaa, taamaattorli Nanortalimmi Siumut Inuit Ataqatigiillu suleqatigiinnissamik isumaqatigiissutaasa, ilaatigut kommunep avammut ammnerulernissaanik imaqartut piviusunngortinneqarnissaat sulissutigissagini oqarpoq.

Aammattaaq Nanortalimmi Alluitsup Paanilu ungdomsklubbeqalernissaa kommunalbestyrelsep suleqatigiinnissamik isumaqatigiissutaa naapertorlugu sulissutiginiarini oqarpoq.

Nanortalimmi kommunalbestyrelsemi borgmesterissamik qinersisoqarnerani Atassut Demokraatillu ilaasortaatitaat taaseqataanngillat.

Taakku saniatigut Inuit Ataqatigiit sinnerlugit ilaasortaq Deborah Kleist aamma taaseqataanngitsoq oqarpoq, taasiumannginnerminut Kristine Raahaugemik piukkussinnginneq peqqutaanngitsoq.

Deborah Kleist oqarpoq, borgmesteri tunuarmat nammineq tulliatut taartaasussaagaluarluni, taamalu Atassut Demokraatillu aamma taama isummersimasut, tamannalu taaseqataannginnerminut toqqammaviusoq. Taamaattorli Deborah Kleistip

borgmesterertaamik suleqateqarnissi qilanaarinerarpaa.