Kristian Jeremiassen: ICC-mut tapiissutit peerneqartariaqarput
Kristian Jeremiassen Namminersolutik Oqatussat ICC-mut ukiut tamaasa tapiissutigisartagai atorunnaarsikkusuppai. Politikeri tassunga atatillugu § 37 naapertorlugu marlussunnik Naalakkersuisunut apeqquteqarpoq.
Allattoq Peter Troelsen, Simon Uldum
oktobarip 28-at 2013 08:09
Jeremiassen paaserusuppaa Naalakkersuisut ICC-mut, NGO-tut taaneqarsinnaasumut, tassalu suliniaqatigiifimmut naalakkersuisunikkut pittugaanngitsumut tunngatillugu qanoq pilersaaruteqarnersut. Nunatta karsiata tapiissutit ICC-mut immikkoortittagai Jeremiassenip peerneqartariaqarsorai.
- Taamatut isumaqarninnut pissutigivara nunatsinni siunertanut allanut atorneqarpata pitsaanerussasoq, assersuutingalugu napparsimaveqarfimmi utaqqisut ikilisarneqarnissaanut aningaasat pisariaqartinneqarput. Tunngaviusumillu isumaqarpunga ICC-mut tapiissutit immikkoortinneqartartut unitsinneqartariaqartut siunertanullu allanut aningaasat immikkoortinneqarlutik, Kristian Jeremiassen nassuiaavoq.
