Kristian Jeremiassen: Atassut qinersinissamut piareersanngilaq
- Ukiup ingerlanerani nunaqarfinni aqutsisunut qinersinissaq taanna piareersarnissaa aamma pingaaruteqartorujuuvoq. Aallaqqaammut januaarimi imaluunniit februaarimi saaffiginnippunga nunaqarfimmi angalasussaangama, aamma qaammarsaanerorusullunga, Atassut pillugu, qinersinissamut piareersaatinik pissarseqqullunga, kisianni aamma paasissutissanik tunineqarsimanngilanga, Kristian Jeremiassen oqarpoq.
Taassumap paasissutissat pisariaqartitani pissarsiarinngikkaagamigit, naalakkersuisooqatigisatik Siumut saaffigisariaqartarsimavai.
Qinersisoqarnissaanut piaareersannginnerup saniatigut aamma sulinngiffeqarnissamik kajumissaarut Atassummut ilaasortaajunnaarnermik kinguneqarpoq. Kristian Jeremiassen inatsisartunut ilaasortaanermi saniatigut Qaasuitsup Kommuniani kommunalbestyrelsemut ilaasortaavoq. Kristian Jeremiassen Atassummit ukiaq kajumissaarneqarsimavoq qinigaaffiup aappaanit sulinngiffeqarnissaanik qinnuteqaqqullugu, tamannali Kristian Jeremiassenip partiimit ajattugaanertut misigisimavaa. Namminerlu isumaqarpoq partii Atassut matoqqavallaartoq.
- Isumaqarpunga Atassummi matoqqavallaartoqarsimasoq, partiilluunniit siulittaasua attavigiuminaattarsimavoq, aamma uanga attavigiuminaattarsimagaluarpunga, kisianni pisariaqarfiatigut attaviginninniarneq ajornartarsimavoq, Assut eqqarsarnarpoq Atassummit aninissaq, kisianni taanna piviusunngortippara, inuiaqatigiinnut sullissinissara aamma pilersaarusiukkamik suleqataanissara pingaartikkakku, Kristian Jeremiassen oqarpoq.
Isornartorsiuinerit Finn Karlsenip eqqumiigivai oqarlunilu Kristian Jeremiassen ukioq nutaaq assut angalasimasoq.
- Ataasinngormat aapriilip arfernani ajunngivissumik oqaloqatigiippugut, Tassani Kristian Jeremiassen Sisimiuni ataatsimiisitsivoq, tassanilu oqaloqatigiinnermi isornartorsiutinik oqaasseqanngilaq, Finn Karlsen oqarpoq.
Nassuiaallunilu Kristian Jeremiassen Qaasuitsup kommuniani kommunalbestyrlsemit sulinngiffeqarnissaanut kajumissaarineq Kristian Jeremiassenip ataatsimiinnernut kiisalu tassunga tunngasunik suliaqanngippallaarneranut isornartorsiuinernik aallaveqartoq.
