Kristian Jensenip tikeraarnera ilassinninnerinnaanngilaq
Suliaq Pituffimmut tunngasoq, urani pillugu apeqqutit, Nunatta Danmarkillu niueqatigiinnerat, Nunatta tunisassiaasa nunarsuatsinni saqqumilaarnerunissaat taamatullu Issittumi Siunnersuisooqatigiinni suleqatigiinnerit oqallisigineqartut ilaannaraat.
- Danskit naalakkersuisuisa politikkiat nutaaq sutigut allannguuteqarniarnersoq Naalakkersuisunit paaserusupparput. Taamaattumik suliat maanna ingerlareersut saniatigut, suut allannguutaassanersut pillugit maanna ilisimatitseqatigiippugut.
Nunanut allanut tunngasunut Naalakkersuisup, Vittus Qujaukitsup isertuutinngilaa, naapeqatigiinnermi oqallisigineqartunut ilaammat Pituffimmi kiffartuussinissamik isumaqatigiissut Danmarkip Nunattalu akornanni aaqqiangiinngissutaasoq pillugu aamma oqaloqatigiissimallutik.
- Amerikamiut Nunatsinniinnerisa kinguneranik Pituffimmullu kiffartuussinissamik isumaqatigiissut atuukkaluarpat atuutinngikkaluarpalluunniit apeqqutaatinnagu, Nunatta aningaasatigut eqqornerlunneqannginnissaa, suliffeqarfiit Pituffimmiittu annaaneqannginnissaat ilinniarfiillu Pituffimmiittut annaannginnissaat qulakkeerniagassatut Naalakkersuisunit suligatta tamanna ullumikkut allannguuteqanngitsoq oqaluttuaraara.
Pitufillu pillugu nunanut allanut tunngasunut ministerip Naalakkersuisullu akornanni isertuussisoqannginnissaa aamma oqaloqatigiinnermi Vittus Qujaukitsup piumasarisimallugu KNR-imut oqaatigaa.
Pituffimmut suliap oqallisigineqarnerata saniatigut, Issittumi Siunnersuisooqatigiinni ataatsimiinnerni Danmarkip Kalaallit Nunaatalu peqataaneranni Nunatta piumasaat Danmarkimit tusaaniarneruneqartariaqartut, Vittus Qujaukitsumit piumasarineqartunut ilaavoq, ilaatigut issittoq pillugu Nunatsinnut tunngassuteqartut taamatullu ineriartortitsinerni Nunatta aningaasarsiorneranut tunngassuteqartut tassani eqqarsaatigineqarnerullutik.
- Oqartussaaffiit annerujartuinnartumik Nunatsinnut tunniussuunneqarnissaat siunertaraarput. Taamaattumik ilaatigut inatsisitigut atortitsinermut ministeriaqarfik, sulisoqarnermut ministeriaqarfik ministeriaqarfiillu allat soorlu ministeriaqarfik urani pillugu oqartussaasoq oqaloqatigiinnitsinni anguvagut.
Nunanut allanut tunngasunut Naalakkersuisoq, Vittus Qujaukitsoq danskit nunanut allanut tunngasunut ministerianit tikeraartoqarnermi nalaani taama oqarpoq.