Meeqqat sorsuffiusuniittut toqutaasartut amerliartuinnartut
Meeqqat eqqissiviilliorfiusuniittut pisinnaatitaaffii 170.000-eriarlutik ukiut qulingiluat kingulliit ingerlaneranni unioqqutinneqarsimapput. Naalagaaffiit Peqatigiit taama nalunaarsugaqarsimapput. Allatulluunniit oqaatigalugu:
Nunarsuarmi meeqqat eqqissiviilliorfiusuniittut pisinnaatitaaffii ukiut qulit kingulliit ingerlaneranni ullut tamaasa 45-riarlutik unioqqutinneqartarput.
Naalagaaffiit Peqatigiit meeqqanut suliniaqatigiiffiat Unicef nalunaarusiami taama allaaserisaqarpoq.
Nunat eqqissiviilliorfiusut, Naalagaaffiit Peqatigiit meeqqat pisinnaatitaaffii pillugit aalajangersagaata 1989-imi akuersissutigineqarneraniilli aatsaat taama amerlatigipput.
- Nunani assigiinngitsuni eqqissiviilliornerit ataatsimut isigalugit sivitsoriartuinnarsimapput, aammik kuutsitsinertaqarnerulerlutillu meeqqat inuusuttullu toqutaanerannik kinguneqalersimallutik, Unicefip qullersaa Henrietta Fore taama oqarpoq.
Meeqqanut saassussinerit nakuusernerillu amerlangaatsiartuarsinnartut
Meeqqat pisinnaatitaaffii siorna 2018-imi 24.000-eriarlutik sakkortuumik unioqqutinneqarsimapput, taakkunannga meeqqat 12.000-it toqutaasimanngikkunik aqqunartitersimallutik.
Kinguaassiutitigut atornerluinerit, aallarussinerit, ikiorsiissutinillu ikiorneqarsinnaajunnaarsitsinerit amerliartuinnarsimapput, soorlu aamma meeqqat sakkutuutut atorneqartut amerliartuinnartut, atuarfiillu napparsimmaviillu saassunneqartartut amerliartuinnartut.
Meeqqanut nakuusernerit saassussinerillu ukioq manna aamma amerlangaatsiarput.
Meeqqammi pisinnaatitaaffii ukioq manna qaammatini siullerni arfinilinni 10.000-eriarlutik unioqqutinneqarsimasut Unicefip oqaatigaa, unioqqutitsinerillumi amerlanerusinnaanerat Unicefip ilimagaa.
