Kreditkortimik atuineq Socialdemokraatinik suleqateqarnermut sunniuteqassanngitsoq
Socialdemokraatit Kalaallit Nunaannut tunngasunut oqaaseqartartuat, Karin Gaardsted, taama oqarpoq.
- Suleqatigiinnermut sunniuteqassanngilaq, isumaqarpunga uannut politikeritut tamanna susassaqarfiginagu. Politikerip pineqartup Folketingillu Allaffeqarfiata akunnerminni aaqqinniagassaraat.
Aleqa Hammondip Folketingimit kreditkorterisani atorlugu 13.000 koruunit missaata nalinganut imminut pisiortorsimanera sapaatit-akunnerata naanerani saqqummiunneqarpoq, kingornalu Folketingip Allaffeqarfianit nalunaarutigineqarpoq aningaasat akiligassat politikerip tulliani qaammammusinerani ilanngaatigineqassasut.
Karin Gaardstedip Aleqa Hammondip Folketingimit kreditkorterisani atorlugu imminut pisiortorsimanera eqqunngitsuliornertut isigigaluarlugu Hammond suli tatiginerarpaa.
Kalaallit Nunaanni qinersisartut tulliani Folketingimut qinersisoqalerpat Hammond suli tatiginerlugu nalilersortariaqassavaat, Karin Gaardsted taama oqarpoq.
