Kreditforeningimit attartorluni inissialiat
Sanaartorneq taamaallaat pingajorarterutaanik qaffassinnaassaaq – ineqarnermut akiliutit qaffasippallaalissammata. Taamaattumik namminersorlutik oqartussat kommuneqarfiillu isumaqatiginniutigaat siunissami Kommunet, Namminersorlutik Oqartussat kiisalu kreditforeningit tamarmik 1/3-mik aningaasaliisassasut. Maannamut illut ataasiakkaat sanaartorneqarnerannut atatillugu kreditforeninginut attartortoqartaraluarpoq, sanaartugassanulli tamanut kreditforeningit aqqutigalugit attartortarnissaq anguniagaavoq. Inissialli 30-t nalinginnaasumik sanaassat attartornikkut 40-ngortinneqarsinnaassapput, tassami 30it pingajorarterutaat quliummata.
Sulisitsisut Peqatigiiffiat GA kiisalu Namminersorlutik Oqartussat akornganni ataatsimiittoqarnerani eqqartorneqaraluarpoq anguniagaassasoq 60 procentit kreditforeninginit attartorneqartassasoq pisortallu 40 procentit aningaasaliissutigisassagaat. Misissuinerilli takutippaat inissialiassat kreditforeninginit attartorluni sanaassat ineqarnermut akiliutissaat ima qaffasitsigissasoq allaat taamaallat aningaasartuutissat pingajorarterutaannik attartorluni inissialiortoqarsinnaassasoq.
Naalakkersuisut siorna saqqummiuppaat siunissami sanaartugassat amerlisarneqarsinnaassasut kreditforeninginit attartortarnikkut. Killilimmilli attartortarnissamut peqqutaavoq inissianut akiliutissat qaffasippallaarnissaat, Inuutissarsiornermut pisortaq Stephen Ulrich-Lynge oqarpoq.
