Kraks Blå Bogimi kalaallit allattorneqarsimasut nutaat

Kraks Blå Bogimi, Naalagaaffeqatigiinni innuttaasut nersugaasut allattorsimaffianni nutarterneqarluni saqqummersinneqartumi, Nunatsinneersut arfinillit ilanngunneqarsimapput.
Allattoq Martine Lind Krebs, Simon Uldum
juunip 25-at 2013 07:50

Tassalu Naalakkersuisunut ilaasortaasimasut Agathe Fontain aamma Maliina Abelsen, Nunaoilip pisortaa Hans Kristian Olsen, Nuna Mineralsip pisortaa Ole Christiansen, isiginnaartitsisartoq Makka Kleist aammalu Artekimi pisortaq Carl Egede Bøggild. Aammattaaq Kalaallit Nunaannut tunngasunik ilisimatooq Kirsten Thisted Kofoeds Skolemilu pisortaq Robert Olsen ilanngunneqarsimapput.

Aqqinik allanik ilanngussinissaq kinguaattooqqalaarpoq, taamaammat Kraks Blå bogip Naalakkersuisut nutaat suli ilanngussimanngilai,  Gads Forlag taama paasissutissiivoq, atuakkamimi allattorsimasut inuiaqatigiinni ataavartumik nersugaasimanissaat aamma qulakkeerniarneqarmat.
Naalakkersuisulli siulittaasuat Aleqa Hammond allattorsimaffimmeereerpoq, 2008-mili ilanngunneqarsimalluni. Aammattaaq Kuupik Kleist, Julie Edel Hardenberg, Ivars Silis, Asii Chemnitz Narup, Ellen Kolby Chemnitz, Henriette Rasmussen, Brian Buus Pedersen aamma Emma Balslev atuakkami nassaassaapput.

Atuagaq 1910-miilli saqqummertalerpoq, ukiormannalu saqqummersoq 104-ssaraat aqqinik nutaanik 304-nik ilaneqarsimalluni. Nunatsinni siornatigut Grøn Bog saqqummersinneqartaraluarpoq, taannali ukiuni qulini kingullerni saqqummersinneqarsimanngilaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq