Aningaasaatilissuup Trump nunatta pisiarineqarsinnaaneranik killissimagaa

Pinnersaasiorfissuarmik Estee Lauderimik kingornussisoq nunatta pisiarineqarnissaanik isumassarsisuusimasoq Trumpillu nunarput pisiareriarlugu Puerto Ricomut taarsiutigilersaarsimagaa, atuakkami marlunngorpat saqqummersinneqartussami erserpoq.

Allattoq Ritzau

septembarip 16-at 2022 10:04

Nutserisoq Jaaku Lyberth

Amerikami præsidentiusimasup, Donald Trumpip, Kalaallit Nunaat Danmarkimit pisiariniarlugu 2019 -mi neqerooruteqarmat uippallertitsivoq.

Kalaallit Nunaata pisiarineqarnissaanut Trump nammineq isumassarsiaralugu oqaatiginikuua, kisianni taamaassimagunnaanngitsoq atuakkami marlunngorpat saqqummersinneqartussami atuarneqarsinnaavoq.

Isumassarsiaq Donald Trumpip ukiorpassuarni ikinngutaanit, tassa pinnersaasiorfissuup Estee Lauderip piginnittuata erneranit Ronald S. Lauderimit pisimagunarpaa.

Tamanna atuakkiami amerikami tusagassiortunit marlunnit allanneqartumi, "The Divder: Trump in The White House, 2017-2021", marlunngorpat saqqummersinneqartussami atuarneqarsinnaavoq.

Kalaallit Nunaata pisiarineqarnissaannut siunnersuut suleqatigiissitamit immikkut pilersinneqartumit suliarineqarpoq, nunatta pisiarineqarsinnaaneranut periarfissat nalilersorneqartussaallutik.

AAMMA ATUARUK Atuagaq atuffassissut: Trumpip nunatsinnik pisinialersaarnera tusarnaarneqarsinnaanngortoq

Nunatta pisiarineqarsinnaaneranut isumassarsiaq Trumpip siunnersortaanut nalornisitserujussuarpoq, nalornisitsinerpassuillu ilaannaralugu, Trumpillu isumassarsiaanut allamut saasarniarsimagaluarpaat, isumaqaramik Trumpip isumassarsiai eqqumiitsuusut illersorneqarsinaanngitsulllu.

Amerikami aviisi The New York Times taama allappoq.

Kalaallit Nunaata pisiarineqarsinnaaneranut isuma pisortatigoortumik saqqummiunneqarpat aallartitaqarnikkut ajornartorsiortoqalernissaa siunnersortit arlaqartut aalleqqutigisimavaat.

Atuakkami saqqmmmersinneqartussami atuarneqarsinnaavoq, pinnersaasiorfissuarmik piginnittup Ronald S. Laudarip Donald Trump præsidentinngoqqammiinnartoq Kalaallit Nunaata pisiarineqarsinnaaneranik isuma pillugu oqaloqatigisarsimagaa.

Nunatta pisiarineqarnissaanut isuma danskit ministeriunerannit Mette Frederiksenimit itigartineqarpoq, tamannalu isumaqanngiluinnartutut taallugu.

Naalakkersuisuusimasoq, Kim Kielsen (S) tassunga tunngatillugu taamani ima oqarpoq:

- Kalaallit Nunaat tuniniagaanngilaq tunineqarsinnaanilu. Kisianni nunanik allanik – USA ilanngullugu.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.