Koreap Kujalliup præsidentiata killeqarfik aqqutigaa
Korea Kujalliup aamma Korea Avannarliup avissaarutaat killeqarfik aatsaat siullermeersumik Korea Kujallermiut siuttuannit aqqutigineqarpoq.
Korea Kujalliup præsidentiata nuliatalu nunat taakkua akornanni killeqarfik sungaartumik nalunaaqutserneqarsimasoq aqqutigaat, atorfilinnillu Korea Avannarlermiunit aamma arnanit koreamiut inuiattut atisaannik atisalersorsimasunit tikilluaqquneqarlutik.
- Neriuutigaara suli amerlanerusut killeqarfik aqqutigerusulissagaat, taamalu oqarluni præsidentip allornialunnguanik allorluni killeqarfik aqqutigaa.
Præsidentip killeqarfik pisuinnarluni aqqutigereerlugulu biilinik Korea Avannarlermi illoqarfiit pingaarnersaannut Pyongyang-imut ingerlaqqippoq. Ullumi kingusinnerusukkut Korea Avannarliup siuttua Kim Jong-Il naapittussaavaa, ulluni pingasuni ataatsimeeqatigiinnissartik aallarnisarlugu, præsidentit taakkua marluullutik ilaatigut Koreap Avannarliup Kujalliullu aningaasarsiornikkut suleqatigiinnissaat oqaloqatigiissutigissavaat.
Tunngaviusumik nunat taakku marluk suli sorsuukkaluarput, tassa Koreami sorsunnermik taasami 1950-imili sorsuuttuarnikuugamik 1953-imiilli sakkuaakkunnaarnissaq isumaqatigiissutigalugu.
