Korea Kujalliup Issittumi pilersaarutai

Korea Kujallermi aallartitaata saqqummiussinermini erseqqissaatigaa, issittumi nunat suleqatigerusullugit. Naak Korea Kujalleq ataatsitassanik pissarsinissamut nunarsuarmi allami periarfissaqaraluarlutik, issittumi nunat sammerusunneruaat.

Nunarsuup avanersuaani ilisimatusarnermi, pisuussutinik uumaatsunik atuinissami, immakkut angallannermi  issittumilu atorneqarsinnaasunik umiarsualiornermi, Korea Kujalliup issittumi nunat suleqatigissallugit pilersaarutigaa.

Koreameersoq apeqqarissaarfigineqarami ilaatigut aperineqarpoq, Nunatsinni urani pillugu Korea Kujalleq qanoq pilersaaruteqarnersoq, akissutissaqanngikkallarluarluni oqarpoq, periarfissalli tamaasa ammaffiginerarlugit. 

- Periarfissat tamarmik ammapput. Apeqqutilli Kalaallit Nunaani uranisiornermut tunngasut  akissuteqarfigisinnaanngilakka, tamakkua Korea Kujallermi siunnersortinnut apuuteqqaartariaqarpakka, Ahn Chong-Ghee, Korea kujallermi nunanut allanut tunngasuni ministerimut tullersortaasoq oqarpoq.

Korea Kujallermiut saqqummiussereerlutik assigiinngitsunik apeqqarissaarfigineqarput. Ilaatigut ilisimatusarfiup pisortaara Tine Parsip Korea Kujalleq Issittumi Siunnersuisoqatigiinni peqataalissaguni qanoq inissisimassanersoq qanorlu pilersaaruteqarnersoq apeqqutigaa. Ahn Chong-Gheep akissutigaa, pisuusutinut uumaatsunut soqutiginninneq annertugaluartoq taava eqqarsaatit pingaaruteqartut allat aamma eqqarsaatigisariaqarlugit.

- Sapinngisarput tamaat aatsitassarsiornerinnaq eqqarsaatiginaveersaassavarput, aamma pingaartitat tunngaviusut  attatiinnarneqarnissaat eqqarsaatitsinni pigiuassavagut. Ahn Chong-Ghee oqarpoq.

Taassuma erseqqissaatigaa, avatangiisit mianerineqarnissaat Korea Kujalliup aamma pingaartikkai.

- Naalagaaffitta erseqqissarniartuarpaa avatangiisit illersorneqarnissaat pingaartikkipput aamma eqqarsaatitsinniittuartussaasoq, Korea Kujallermiut sinnerlugit ilisarititsisoq taama oqarpoq.

Ataatsimeersuarnermi Arctic Circlimi Korea Kujalleq kisimi nunani avannarlerni soqutiginnittuunngilaq. Korea Kujalliup sanilia, Kina, Issttumi suleqateqaleqqaanniuttunut ilaavoq.

Kina Qalasersuarmi eqqaanilu soqutigisaqaqaaq soorluttaaq umiarsuit issittup imartaani aqqutaannik soqutiginneqisoq.