Korea Avannarliup qaartitaa nunatsinniit uuttortarneqarsinnaasimavoq

Korea Avannarliup atomip nukinganik qaartartulianik misileraalluni ippassaq qaartitsinera uuttortaatinik Kalaalit Nunaanniittunik malugineqarsinnaasimavoq. Danmarkimi Kalaallit Nunaannilu ujarassiuutut misissuiffik, GEUS, nittartakkamini taama allaaserinnippoq.
Allattoq Karsten Sommer
maajip 26-at 2009 14:32

Nunap sajuttarneranik malussarniutit Kalaallit Nunaanniittut Danmarkimiittullu naapertorlugit Nunatta nalunaaqutaa naapertorlugu sapaatiummat unnukkut aqqarnup missaani Korea Avannarlermi qaartitsisoqarsimasoq uuttortaatit takutippaat.

Nunap sajunnera avannaani malugineqaqqaarpoq, Danmarkshavnimi malugineqaqqaariarluni, ilisimatuutut misissuiffimmi Summit Campimi malugineqarpoq, minutilu ataaseq qaangiummat Bornholmimi malugineqarluni. Ujarassiuut GEUS-imeersut taama ilisimatitsipput.

Nunap sajuttarneranut uuttuut naapertorlugu nuna 4,8-mik sajuppoq. Ilisimatuut USA-meersut uuttortagaanut tamanna naapertuuppoq, uuttortakkatik ippassaq saqqummiukkamikkit aamma taama nalunaaruteqaramik.

Korea Avannarlermi nuna sajummat sekundialunnguaannaat sajuppoq. Qaartartumik qaartoqarsimaneranik tamanna takussutissaannaavoq. Nunami sajukkaangat sivisunerusumik sajuttarpoq, qaartoqarneranilu sivikinnerulluni. GEUS allappoq.

Korea Avannarliup atomip nukinganik qaartartuliamik misileraalluni qaartitsinera nunarsuarmioqataasunit assuarineqaqaaq.

- Korea Avannarliup nunarsuarmioqatigiit tunuunnarlugillusooq iliuunnassaguni kingunissai malugisariaqarpai. Misileraanerit akuersaarneqarsinnaanngilluinnarput, USA-p Naalagaaffiit Peqatigiinnut aallartitaa Susan Rice, tv-qarfissuarmut CNN-imut ullumi oqarpoq.