Korea Avannarlermiut saammaasserusulerput
Korea Avannarlermiulli qisuariarsimanngillat, amerikamiullu tusarsimavaat, taakku Naalagaaffiit Peqatigiit misissuisartuinit atomip nukinganik sakkussiornerisa misissorneqarsinnaanerata isumaqatigiinniutiginissaannut piareersimasut. Tamannalu attaveqaqatigiinnermit pitsaasumit, Korea avannarliullu qununeranit, pisinnaanngorsimasoq, paasisimasalik naliliivoq.
Korea avannarliup tv-qarfiani nutaarsiassanik atuaasartup ullumi oqalunnera pisarnermisut sorraatsigaaq, oqaatigineqartorli sammaasseqatigiinnissamik nipeqarluni.
- Korea Kujallermiut kamassaarinerat narrujuumminartoq Korea Avannarliup kisermaassillutik naalakkersuisuisa sakkutuuisa akiniassallugu pisariaqartissimanngikkaat, nutaarsiassanik atuaasartoq oqarpoq.
Korea Kujalliup sakkutuunik sungiusartitsinini ingerlatissappagu, Korea avannarleq sapaatip akunnerani kingullermi sorsunnissamik sioorasaarigaluarpoq.
Tusarluarnaqaaq, Korea avannarlermik paasisimasalik Geir Helgesen Korea avannarlermi kujallermilu tikeraaqqammersoq oqarpoq.
- Korea avannarleq akiniaanngimmat oqiliallaatigeqaara, nuannaarutigaaralu USA kiisami nuimasumik Korea Avannarlermiunik oqaloqateqartussamik aallartitaqarmat, Geir Helgesen oqarpoq.
Korea Avannarlermiut isumartik allanngorteriasaarpaat. Amerikamiummi tusarsimavaat Naalagaaffiit Peqatigiit misissuisartuisa atomip nukinganik sakkussiornertik misissorsinnaagaat, Korea Avannarliup akuerisimagaa. Amerikamiu politikeri nuimasoq Bill Richardson, Korea Avannarlermi isumaqatiginninniareersorlu taama tusartoqarsimavoq. Tikeraarneq sorsunnissamik pinngitsoortitsisoq, Geir Helgesen, Nunani Avannarlerni Asia pillugu ilisimatusarfimmeersoq, isumaqarpoq.
- Korea Avannarlermiut akiniaallutik saassussinnginnerannut Bill Richardsonip tikeraarnera peqqutaasoraara, Geir Helgesen oqarpoq.
USA-p Korea avannarliullu isumaqatigiinninniarnerat aqqutissaasoq Geir Helgesenip nalilerpaa, Korea avannarliummi matoqqasup Korea kujalliup sakkutuuminnik sungiusartitsinera anilaangassutigaat.
- Sakkutuunik sungiusartitsineq kingulleq sinerissamut qanissimaqaaq, Korea avannarlerlu kisermaassisumik naalakkersuisoqaraluarluni annilaanganermik sakkortuumik misigisinnaasarpoq, Geir Helgesen oqarpoq.
Korea avannarliup atomip nukinganik sakkussiornerminnik misissuisoqarsinnaaneranik akuersinertik pisortatigoortumik suli nalunaarutiginngilaa.
