Korea Avannarlermiut atugarliorput
Napparsimasut ilisimajunnaarteqqaarnagit sinitseqqaarnagilluunniit nakorsat avatit ilaannik kipisisariaqartarput, avatinillu kipisineq sikaritsinik imigassanilluunniit akilerneqartarpoq.
Koreami Avannarlermi pissutsit nalunaarsorneqarnerat qanoq ajortiginersoq inuttut pisinnaatitaaffinnik illersuiniaqatigiiffiup, Amnesty Internationalip, nalunaarusiaani nutaami takuneqarsinnaasoq, Danmarkip Radioata nittartagaani allaaserineqarpoq.
Innuttaasut 23 millioniusut Koreap Avannarliup qaarsillartillugit nerisissinnaanngilai. Peqqinnissaqarfillu atortussanik pisariaqartitanik amigaateqartoq, nalunaarusiami erseqqissaatigineqarpoq.
Ikiuiniartut nunarsuarmit tamaneersut, nunaminnilu pissutsinut akerliullutik qimaallutik nuuttut, apersorneqartarnerannit paasisat nalunaarusiami tunngavigineqarput. 24-nik ukiullip Hwangip, nakasunnaaminiit ammut nissuni qanoq kipitissimallugu oqaluttuaraa:
- Nakorsanut ikiortit tallimat aalajangerlunga tigummivaannga. Anniaqaanga, nilliasorujussuullungalu, oqaluttuarpoq.
Koreami Avannarlermi aningaasat ukioq kingulleq qaffanneqarmata pissutsit ajorserujussuarput. Aningaasat naleerukkiartornerat pissutigalugu inuit ilaat nerisassarsiniarsinnaajunnaarput. Qaqorteqqasut ukiup ataatsip ingerlanerinnaani marloriaammik akeqalerput, provinsimilu ataatsimi inuit tuusintilippassuit ukiuunerani perlerlutik toqorartut, ikiuiniaqatigiiffik Good Friends naliliivoq.
