Korea Avannarlermiut atombombemik qaartitsisimaneragaapput

Kinap Korea Avannarleq ukiuni arlalinni isumaqatiginniarpaa atom atorlugu sakkussiorneq unitseqqullugu.

Nunap iluani atom atorlugu unnuaq qaartitsineq killigalugu immaqa Kinap eqqissisimasumik isumaqatiginniarneq atorunnaartussanngoraa, DR-ip Kinami tusagassiortuata nalunaarutigaa.

Kinap nunanut allanut ministereqarfia Bejingimiittoq ullaaq manna ulapaarfiuvoq. Korea Avannarliup atom atorlugu nunap iluatigut qaartitsinera kiisami sukkasuumik qisuariarfigineqarpoq. Kingullermik Korea Avannarleq qaartartunik arfinilinnik atomertalinnik juulimi igeriussimmat ulloq unnuarlu ataaseq aatsaat qaangiummat Kinami qisuariartoqarpoq.

Qaartitsisoqartinnagu tamatigut Kina mianersoqqusisarpoq. Japanimiut Kinamiullu aallartitaasa ippassaq unnukkut naapisimaarneranni ministeriaqarfiup oqaaseqartartuata mianersoqqussutit uteqqippai:

- Atom atorlugu qaartitsissappata ernumanarsissaqaaq, Kinami nunanut allanut ministereqarfiup oqaaseqartartua oqarpoq.

Korea Avannarlermiulli attuumaneqanngitsutut tamatigut ittarput. Unnuaq qaartitsinerit naakkitsaatsuliornertut Kinamiunik isigineqarput. Korea Avannarlermiut kangiani naalagaaffiit arfinillit siorna isumaqatigiinniarnerannit aniinnarnikuusut maanna ilannguteqqinnissaat Kinamiunit piumasarineqarpoq.

Kinap taamatut piumasaqarnera arlalinnik tunngaveqarpoq: siullertut aaqqiiniarneq pitsaanerpaaq taamaalilluni nassarineqarsinnaasorineqarpoq, aappaattut Kinamiut nunanut allanut politikkeqarnertik eqqisseqatigiinnissamik akaareqatigiinnermillu tunngaveqartoq taamaalillutik takutissinnaalissagaluarpaat.

Kinap taamatut politikkeqarnera qangali malunnarunnarpoq, amerikamiut japanimiullu ippassaq oqarput.

- Kinamiut siulittaasuugamik Korea Avannarlermiunik naqqiisariaqarput, Japanimiut ministeriunerat oqarpoq.

Kina kisiartaalluni Korea Avannarlermik tapersersuisuuvoq. Korea Avannarliup nerisassat orsussallu Kinamit pisiarisarpai. Kina taamaalilluni kisimi Korea Avannarliup qanoq pineqarnissaanut aalajangiisussanngorpoq.