Korea avannarlermiu sianiutinut toqunartumik inuartarineqartoq
Malaysiami politiit, nutaarsiassaqartitsiviit Reuters aamma AFP naapertorlugit, tallimanngornermi taama ilisimatitsipput.
Sianiutinut toqunartoq Malaysiami pilersinneqarsimanersoq nunamulluunniit anngiortumik eqqunneqarsimanersoq suli paasineqanngilaq.
- Paasiniaaneq ingerlapparput, politiit pisortaat Khalid Abu Bakar nutaarsiassaqartitsivik Reuters naapertorlugu taama oqarpoq.
- Toqunartoq annikitsunnguaq nunamut eqqunneqarsimassappat nassaarinissaa ajornakusoortupilussuussaaq, pisortaq oqarpoq.
Sianiutinut toqunartup sinnikui angutip Korea Avannarlermeersup, Malaysiami illoqarfiit pingaarnersaanni Kuala Lumpurimi timmisartoqarfissuarmi sapaatit-akunnerata siuliani toqutaasup, isaanit kiinaanillu misiligutissatut tiguneqartuni nassaarineqarput.
Angutip toqunartoq atorlugu toqunneqarsimanissaa Malaysiami politiit aallaqqaataaniilli ilimagisimavaat.
Kim Jong-namip Pyongyangimi aqutsisut naalakkiuteqarnerisigut toqutaasimanissaa Korea Kujalliup naalakkersuisuisa qularutiginngilaat.
Taanna nunagisaminit qimarngusutut nunani allani ukiorpassuarni inuuvoq. Naalakkersuisut naalakkiuteqarnerisigut qoqassiilluni inuartarineqarsimanera Korea Avannarliup ilumuunnginnerarpaa.
/ritzau/
