Korea avannarlermi qaqorteqqasut tunineqaqqusaajunnaarput
Korea avannarlermi innuttaasut ilungersunartunik atugaqartinneqarput. Korea avannarlermi innutaasut 7 millioninik amerlassuseqartut nerisassanik inuussutigisinnaasaminnik amigaateqarput, Danmarks Radiup nittartagaani tamanna atuarneqarsinnaavoq.
Allattoq Lotte Holm
marsip 17-at 2009 08:36
Innuttaasut inuussutissaminnik amigaateqararaluartut pisortat aalajangerput, qaqorteqqasut niuffaffinni tuniniarnissaat inerteqqutigineqassasut arnallu 49-it inorlugit ukiullit niuerniarnissaat inerteqqutigineqarluni.
Nunaatillit pisortanit aamma piummaffigineqarput nerisassat pigisatik sakkutuunut tunniutissagaat.
Korea avannarlermi 8,7 millioninik inoqarpoq taakkunanngalu 7 millionit avataanit ikiorneqarnissartik pinngitsoorsinnaanngilaat.
Ukiup uumap aallartilaarnerani avataanit ikiuutit inunnut 2 millioninut taamaallaat anngupput.
Naalagaaffiit peqatigiit nalunaarusiaat aallaavigalugu Korea avannarlermi pissutsit pillugit paasissutissat tusarliunneqarput.
