Korea Avannarleq qaartartumik igeriussisoq
Qaartartoq igeriuttagaq 6000 kilometerit angullugit ungasissusilimmut igeriunneqarsinnaavoq, atombombenullu igeriussissutigineqarsinnaalluni. Qaartartorli igeriunneqartoq nunarsuarput kaavillugu aallartinnaniluunniit Manerassuarmut nakkarpoq. Nakkartinnani Japan qulaallugu ingerlaqqaarpoq, taamaammat Japan Naalagaaffiit Peqatigiit isumannaallisaaniaqatigiivini piaartumik ataatsimiigiaqqusivoq.
Igeriussineq USA-mit ilungersunartutut isigineqarpoq, aamma præsident Barack Obamap ajorsitsaarinertut taavaa. Amerikami naalakkersuisut Korea Avannarlermut igeriussinerup kingorna naleqquttumik iliuuseqarnissamik sioorasaaripput, tassami USA isumaqarmat, taamaaliorneq Aasiap avannaata kangianut tamarmiusumut nunarsuarmioqatigiinnullu qunusaarinerusoq.
Kina, Naalagaaffiit Peqatigiit Isumannaallisaaniaqatigiivini aalajangersimasumik ilaasortaasoq, Koreamut Avannarlermut illiivoq, nunarsuarmioqatigiillu eqqissisimanissaannik kaammattuilluni. Kina immikkut iliuuseriniarneqartunut naaggaarsinnaatitaavoq, taamalu iliuuseriniarneqartunut akornusiisinnaalluni.