Koranimik ikuallaaniarneq sakkutuunik ulorianartorsiortitsisinnaavoq
Floridami ilagiit muslimimik upperisallit atuagaataannik illernartumik arfininngorpat ikuallaaniarlutik nalunaaruteqartut ikittunnguugaluarput.
Tassanngaanniilliuna ilagiit musliminut akeqqersimaartut nalunaarutaata tamatuma general David Petraeus aalassatsikkaa:
- Koranit katersorniarpavut taakkunanngalu ikumatitarujussualiorluta, Dove World Outreach Centerimi palasi nassuiaavoq.
Taama iliornissaq - general Petraeusip oqarnera naapertorlugu - Afghanistanimi sakkutuujunngitsunik sakkutuunillu ulorianartorsiortitsilissaaq suliariniakkamillu tamarmiusumik ulorianartorsiortitsilissalluni.
Tassami ikuallaanissaq pillugu nutaarsiassaq Afghanistanimut anngussimavoq.
Inuit 100-llit Kabulimi ippassaq akerliuniarlutik aqqusinermiipput. Tamaani Amerikamiut erfalasuat ilagiillu siulersortaata palasip Terry Jonesip inuusaasaliarinera ikuallanneqarlutik.
Koranimik ikuallaanermi USA-p nunatut musliminik uumissuisutut Talibaninit naqissuserneqarnissaa general Petraeusip siulittuutigaa.
USA-mi koranit ikuallanneqarnerisa assilineqarneri Talibaniinnaanngitsunut, aammattaarli muslimimik upperisalinnut allanut sunniiniutigineqassasut, Petraeus oqarpoq. Amerikamiut Afghanistanimi aallartitaqarfiata aammattaaq koranimik ikuallaasarnissatut pisussat assorsuaq isumakuluutigai. Mianersoqqusinerilli Floridami ilagiinnguit palasiannut Jonesimut sunniuteqanngillat.
- Oqaluinnarnerup iluaqutaanngissusia malunniukkumaarpoq, akiuunnissamut piffissanngorpoq, palasi taanna oqarpoq.
Floridami ilagiit arfininngorpat kikkut tamat takusinnaasaannik ikuallaanissaminnut itigartitaasimapput. Palasili Terry Jones oqarpoq taamaakkaluartoq ikuallaasoqarumaartoq.