Barack Obamap pilersaarut taanna "Amerikamiut pingaartitaannut unioqqutitsilluinnartutut" taavaa.
TV-mi ullaakkut aallakaatitassiami Barack Obamap palasi assortuussutaasoq Terry Jones toqqaannartumik oqaluffigaa:
- Tusarnaarpat taava neriuppunga paasissagaa tamanna uagut Amerikamiusugut pingaartitatsinnut akerliulluinnarmat.
Palasip islamimut akerliuniartup korani arfininngorpat ikuallassamaarpaa septembarip aqqarnganni ullormi saassussinerit nalliussineqarfianni.
- Tamanna sapiillisaarneruvoq, Obama oqarpoq.
- Tamanna nunarsuarmi tamarmi sakkutuutsinnut ilumut ajoqusiissaaq, præsidenti oqarpoq, isumaqarlunilu koranimik ikuallaanissaq Al Qaedap pilersaarutaanut tulluarluinnartuussasoq.
- Tamanna Al Qaedap sakkutuulersuilernerujussuanik kinguneqassaaq.
Palasi Floridamiittoq taamaallaat 50-inik malitseqarpoq, ullunili kingullerni Anders Fogh Rasmussenimit, Hillary Clintonimit allaallu paavimit assuarineqarluni.
Taassuma manna tikillugu koranimik ikuallaassamaarnini unitsikkumanngilaa.
- Assorsuaq tatineqarsimavugut, kisiannili septembarip aqqarnganni pisussatut pilersaaruterput ingerlatiinnassavarput, Terry Jones ippassaq unnukkut oqarpoq.
Nutaarsiassaq kingullerpaaq tassa palasi nutaarsiassaqartitsivimmut AFP-mut oqarsimammat iliuusissani unitsissagunarlugu, præsidentip illorsuanit taamaalioqquneqaruni.