Kopeerissaguit akileeqqaassaatit

Atuakkiortut kattuffianni siulittaasoq Hans Anthon Lynge aperaarput tamanna qanoq isumaqarfigineraa.

- Iluarisimaarparput, aammami tamatuma atulersinneqarnissaa ukiorpaalunni sulissutiginikuuarput, Hans Anthon Lynge oqarpoq.

Taanna aperaarput aningaasat nakkartussat qanoq atorumaarneraat.

- Aningaasat piginneqqaartunit ataasiakkaanit qinnuteqaateqarnikkut pissarsiarineqartartussaapput. Qanorli ilillugit qinnuteqaatigineqartarnissaat suliaralugu aallartinneqartussaavoq, akivoq.

Hans Anthon Lynge apereqqipparput aningaasat atuakkiortunit pisariaqartinneqartut naammattumik pineqarnersut.

- Aningaasat ukiuni arlalinni uninngaannalersimasut aningaasarpassuupput, kisianni procentinut assigiinnngitsunut agguataarneqarnissaat siunnersuutaavoq. Soorlu atuakkat takorluukkatut allatat eqqarsaatigigaanni 80 procentii atuakkiortuanut nakkartartussatut eqqarsaatigineqarpoq, Hans Anthon Lynge oqarpoq.

Taanna nangilluni assersuusiorluni nassuiaavoq atuarfiup atuagaq atorsimappagu atuarfiup nalunaarutigissagaa nuutitatut atorsimallugu (kopiikkatut).

- Taava taanna najoqqutaralugu pissarsiassalik pissarsiassaanik tunineqartussaassaaq. Aningaasalli taakku peqatigiiffimmut nakkarnatik affaa atuakkiortumut affaalu naqiterisitsisumut nakkartassaaq, Hans Anthon Lynge oqarpoq.

Hans Anthon Lynge aamma oqarpoq suliffeqarfiit allat akiliisarnissaat aammattaaq suli eqqarsaatigigitsik soorlu aviisiliortut, assilialiortut assigisaallu.