Kontolersuinerit kukkusat

Suliassatut pilersaarutit sanaartugassanut iluarsagassanullu aningaasaateqarfimmit aningaasaliiffigisat suli torinngitsortaqaqaat, Inatsisartut kukkunersiuinermut ataatsimiititaliaat uparuaavoq.

Kisitsisit arlalippassuartigut naapertuutinngitsortaqarput, ilami inatsisartut aningaasanut ataatsimiititaliaata akuersissutiginngisaanik aningaasartuuteqartoqarsimavoq, kukkunersiuinermut ataatsimiititaliaq ukioq kingulleq pissutsinik misissuinerminit allaaserinnippoq.

Aningaasanut ataatsimiititaliaq immikkut ittumik qinnuteqarfigineqartarsimanngilaq, kalaallisut nutsigassat suliassamut tunngasut angumeqqussinnaannginnerat utoqqatsissusiullugu

suliap aallarterikkap suliarineqarnerminili akitsortoorsimasup immikkut ittumik qinnuteqaatiginissaa pinngitsoortarsimalluni, kukkunersiuisut allapput.

Tamatuma saniatigut sanaartugassanut iluarsagaasanullu aningaasaateqarfimmi kukkusumik kontolersukkanik ulikkaarpoq.

Kukkunersiusut isumaat malillugu ajortuliat ilagaat suliassanik timitaliisussap INI-p ineqarnermullu pisortaqarfiup nalunaarfigeqatigiittarnerata amigarluinnarnera, suliassanut pisortaqarfimmit unitsinneqareeraluanut allaat aningaasaarutaasarsimallutik.

Sulilu kukkunersiuinermut ataatsimiititaliap uparuartuutigaa suliassanut missangersuusiarisimasat ilaat piviusorpalunnerunatik neriulluarpalunneruallaartut.

Ukioq 2003-p naanerani aningaasaateqarfik 636 mill. kroninik imaqarsimavoq, missangersuutillu suliassat akiviinut naleqqiullutik aningaasartakippallaaraangata ”unittoortoqartarpoq” – soorlu kukkunersiuisut oqaaseq taanna atoraat – taamalu aningaasaliissutit atorneqarnissaminnit kingusinnerusukkut atorneqartarput.

Kukkunersiuinermulli ataatsimiititaliap atuivallaarutit katillutik qanoq amerlatiginerat kisitsitalersimanngilaa.

Ineqarnermut piosrtaqarfik oqaaseqartinniaraluartasigu iluatsitsinngilagut.